Март зурул 28 -нний Лакрал райондалийсса Гьуйннал шяраву хьунни Хъурдаккаврил байран. КIийва яхъанахъисса бакъассагу, Хъарас щаврил кьинилийн бавтIун бия гила-тиха бувкIмигу, чIахху-чIарахмигу.
Жунма цинявннан кIулсса куццуй, ялун дирсса баласса пандемия сававну, дукIусса шинал сайки циняв шяраваллаву Хъарас щаврил шадлугъру къадурнура лирчIссия. Гьуйннал шяравусса дукIусса Хъурдаккаврил кьуру цайнма лавсун уссия жяматрал дянив ца сий ххисса, буттал кIанттулгу хьхьичIунсса патриот, Карашрал администрациялий чIярусса шиннардий бухгалтерну зий ивкIсса МахIаммад Исмяилов.
Цуксса кьурчIинугу, цаппара чIумул хьхьичI МахIаммад зевххунни жула дянивату захIматсса цIуцIаврил. Му къабартбивгьунма ливчIун бивкIсса кьуругу цайнма лавсун, гьашинусса Хъарас щаврил кьини лархъунни МахIаммадлул куявнал (душнил ласнал) Илияс МахIаммадовлул, ва лайкьсса даражалий щаллугу бунни му мурад.
Ялунсса, яни 2022-ку шинайнсса, Хъарас щаврил кьинилул кьуру кьамул бунни Карашатусса Кьурбаннул арс Кьурбанов МахIаммадлул (Гьуйннал жяматрал куявнал).
Яраппий, коронавирусрал къиягу ялату ларгун, буллугъсса шингу хьуну, жула цинявннал хьхьичIу-хьхьичIунми мурадру бартлавгун лякъиннав!
Ва байрандалийн Карашрал администратор Захар ХIусайновлущал архIал бусравсса хъамалну бувкIун бия: Альберт Шугаев, Сулай Оьмариев, Жаватхан МахIаммадов, Магьди Аьбдуллаев.
Тяхъашиврул программалул бутIа лайкьсса даражалий сакин бувну бия Карашрал Культуралул къатлул каялувчинал бурж биттур буллалисса ХIабиб Кьурбановлул.
