Росгвардия сакин хьусса кьинилун хасну МахIачкъалалив «Аьра­сат – Ттул тарих» музейраву тIивтIунни «Дагъусттаннал аьрали савлугъ» (Боевая слава Дагестана) цIанилусса цIусса экспозициялул зал.

Ва тIитIлатIисса мажлисрай гьуртту хьунни Дагъусттаннал ХIукуматрал председательнал хъиривчу Муслим Телякавов, Дагъусттаннал жагьилтурал иширттал министр Камил Саидов, Росгвардиялул аьралитал ва ветерантал. Мероприятие тIитIлай, ихтилат бунни Тарихрал музейрал директор Тимур Велихановлул. Ванал кIицI лавгунни экспозициялул залдануву душиву Буттал кIанттул цIанийсса Хъунмасса дяъвилул шиннардия тIайла хьусса, Дагъусттаннал халкьуннал къучагъшиврия бусласисса аьрали летопись.
Хъирив ихтилат бувсса Муслим Телякавовлул кIицI лавгунни Росгвардиялул аьралитал, терроризмалущалсса, экстремизмалущалсса ва сакиншиннарайсса тахсиркаршивурттащал­сса талатавриву хьхьичI ххуттай бавцIуну, агьалинал мюхчаншиву дуручлай бушиву.

Ихтилатру къуртал хьуну махъ цинявннал ххал бунни цIусса экспозициялул зал. Музейрал зузалал балжину бувсунни цинярдагу шикку ккаккиялун дирхьу­сса экспонатирттая. Выставка тIиртIуну махъ музейрал актовый залдануву хьунни «Ххувшаврил волонтертал» тIисса щалагу Аьрасатнал жяматий­сса суккушиндарал региондалул отделениялул хIадур дур­сса концерт. СахIналия патриот композицияртту ккаккан дунни ва балайрду увкунни Росгвардиялул МахIачкъалаллал соединениялул ва Дагъусттаннал филармониялул артистурал.
Халкьуннал къавтIавурттайну ва аьрали темалийсса постановкарттайну концертрал программа хъинну чIюлу дурну, авадан дунни МахIачкъалаллал музыкалул школардал творчествалул коллективирттал. Дагъусттаннал Росгвардиялул управлениялул хъунаманал кумагчи, полициялул полковник Константин Шиняннул барчаллагь увкунни мероприятиялул сакиншинначитурахь.
– ТIааьнну асар хьунни жула юбилейрая кIулну бушиву, дакIний бушиву, вания аьм­сса байран хьушиву.

Жу мудангу хъуннасса къулагъас дуллай буссару ялун нанисса ник Ватан ххирану тарбия шаврих. Байрандалул кьинилун хасну «Дагъусттаннал аьрали савлугъ» музей тIитIаврилгу исват буллай бур жу лайкьну дуручлай бушиву жула аьралуннал цIагу, сийгу. «Мудангу къаралданий» тIисса жул девизрал аьч дуллай бур гьарицагу жул зузалал оьрмулул тагьар. Жу уттиния тихунмайгу хIарачат буллантIиссару Да­гъусттаннай паракьатшиву ядан, – увкунни ванал.