2018-2020 шиннардил мутталий Аьрасатнаву яхъанахъисса цинявгу халкьуннал аьдад чIири хьуну дур 711 азара инсан яла лагаврийну. Вай хъанахъиссар циняв аьрасатлувтурал 0,5%.

Махъсса шинал билаятрай­сса демографиялул тагьар ­оьнийн дагьаврил сававну хьуну дур коронавирусрал азар ппив шавугу. Азар сававну ялун ливчуну бур ца цамургу масъала. Масалдаран, миграциялул ишру хIисавравун лавсун, пандемия хьуннин билаятрай яхъа­нахъиминнал аьдад хъун хъанай диркIхьурча дазурду ларкьуну махъ, чIалан бивкIун бур халкь чан шаврил савав ва иширацIунгу дархIусса душиву.
2019 шинах бурувгун, 2020 шинал аьрасатлувтурал аьдад чIири лирчIун дур 18.
Агьалинал аьдад лахъ хьусса регионнавух бур Севастополь – 16,8%, Ингушнал республика – 5,6%, Ленинградуллал область – 4,3% ва Чачаннал республика – 4,2%.
Халкьуннал аьдад лахъ хьу­сса регионнавух мукунма бур Москавуллал область – 206,9 азара инсан, Москав – 148,8 азара инсан, Краснодарский край – 83, 7 азара инсан. Ялун ххи хьу­сса халкьуннал яла чIиримур ­аьдад хIисав хьуну дур Чукоткалий – 220 инсан.
ОьрчIру баврийну халкьуннал аьдад хъун хьуну дур билаятрал 17 региондалий. Миннувух хьхьичIва-хьхьичI бур Дагъус­ттан – 91,2 азара инсан.
Вай хIасиллал чIалачIи буллалиссар агьали чан-чIяву шаврил сававртту цагу-кIирагу да­къашиву. Масалдаран, агьалинал аьдад чIири-хъун шаврил цания-ца сававну хъанахъи­ссар экономикалуцIун, цумур-цагу региондалий ягу шагьрулий маэшатрал иш-тагьар къулай ягу къакъулайсса душивугу. Севастополлай халкь чIяву шаву статистикалуха зузисса пишакартал бувчIин буллай бур ва регион цIана ца яла лябукку буну, давурттай зунсса пишакартал аьркинну, щалва Аьрасатнава шиккун халкь бивзун най бушиврийну. Мукуннасса тагьар дур билаятрал хъуншагьрулийгу, маэшатрал чулуха авадан­сса вайми регионнайгу. Ккавкказуллал республикарттай кулпатирттаву мудангу оьрчIру гьарзану байссия. Мунияту цIанагу вайми регионнах бурувгун, ва ­аьдат дурурччуну дуну тIий, кулпатирттаву чIявусса оьрчIру бавугу агьалинал аьдадрайн асар шайсса ишри.