Апрельданул 12-нний, щала билаятрай космосравун цалчинсса инсан левххун 60 шин хьусса иширан хасну, МахIачкъалаллал Жагьилтурал центрданий хьунни Дагъусттаннал шагьрурдая ва районная бувкIсса дуклаки оьрчIал Совет Союзрал Виричу, летчик-космонавт Муса Маннаровлущалсса хьунабакьаву.

«Виричунащалсса ихтилат» тIисса проектрал лагрулийсса ва хьунабакьаврил сакиншинна дурну дия ДР-лул Жагьилтурал иширттаха зузисса министерствалул. Дуклаки оьрчIавух бия кадетътурал школарттай дуклакиссагу, республикалул ва билаятрал даражалийсса конкурсирттай ва олимпиадарттай ххув хьусса гьурттучитал ва волонтерталгу. ХIасил, бия, мюрщи кла­ссирттая тIайла хьуну, колледжирттал студентътурайн бивсса оьрчIру ва душру.

Бия шиккун бувкIун республикалул цаппара ведомстварттал къуллугъчитал, жяматийсса ишккаккулт, шаэртал, учительтал ва журналистъталгу. ЩапI куну бувцIусса центрданул залдануву щябикIансса кIанттурду биял къавхьуну, бия ччаннай бавцIуну Муса Маннаровлух вичIи дишин хIадурссагу.
Хьунабакьавугу дайдирхьуна оьрчIру хъамаличунащал кIул бансса мурадрай хIадур дур­сса видеороликрая. Бувсуна ганиву Мусал нитти-буттаягу, ганал оьрчIшиврул шинну ларгсса шагьрурдаягу. Архиврава ларсун, кка­ккан дуруна оьрчIан космонавтнал Аьламраву дурсса съемкардугу, га аьрщарайн зана хьусса чIунгу.
Видеороликрая махъ байбивхьуна оьрчIал ва хъамаличунал дянивсса ихтилатру. Суаллу бия жура-журасса, суаллу булун ччимигу бия кIилий-шамлий чIявусса.
ОьрчIал буллалиминнуву ца яла чIявуну тикрал хъанахъисса : «Аьрщарая архсса аьламравун дахьва гьаз хьуну, зувалу станциялий ливчIсса чIумал цукун­сса асарду хIасул шайва?» – тIисса суалданун Муса Маннаровлул увкуна: «Вайми даврил уртакьтурал къакIулли, ттуллив асарду бия, мяйжаннугу дуркIссаривавли ва, циняр хъиривлаявурттугу, хIакинтал ва экспертъталгу аьрщарай кьабивтун, нава космосравун левхсса кьини тIисса».
ОьрчIан гъира бия цимурцаннуя цIуххин. ЦIухлай бия космонавт хьуншиврул ци хасиятру инсаннаву дикIан аьркинссар тIий, суаллу бия космосраву яла дукан нахIусса дукра цумур дия тIиссагу, дакIниву нигь-ццах багьссагу чIун хьунав, бизаршиву дикIайвав, нину-ппу, оьрчIру, кулпат кка­ккан ччан бивкIни ци байссия, чIун лахъину чIалан дикIайвав тIиссагу. Бия аьжа­ивсса ишру хIисав хьунав космосраву тIий цIухлахиссагу.

«Аьламрава, кIаксса лахъния, цукун чIалай дия жула Аьрщи?» – тIисса суалданухьхьун жаваб дуллай, Муса Маннаровлул увкуна: «Аьрщи кунна ккаккангу ххуй­сса, караматссагу цамур зат аьламраву дакъахьунссар. Масалдаран, ца Кьиблалул Американаву цанниха ца лархьхьусса щин дусса кIира нех лякъин ттуща къархьуна. Муксса махIатталсса, эмаратсса зат диркIун дия жулла Аьрщи. Ва дуруччингу, мюхчанну ядангу зул, ялун нанимур никирал, буржри», – куну.
«Хъунна перемена» тIисса проектрай ххув хьусса жула ла­кку оьрчI Даниял Шабановлулгу Муса Маннаровлун хас дурну цала чирчусса лакку мазрайсса ва оьрус мазрай­сса назмугу дур­ккуна. Дагъусттаннал оьрчIащал хьунаакьинсса ва вайксса суаллан жавабру дулун­сса чIун лякъаврихлу барчаллагьрал махъгу лавхъун, Муса Маннаровлун цува ивхьусса сурат пишкаш дурна ванал дус, чIявучин кIулсса фотохудожник Каламадин Кьурбановлул.
Хьунабакьаврил ахирданий цинявннал аьмсса суратгу рирщуну, хъамаличунал цалла къулбасгу дирхьусса суратру дарчIуна суаллу булавриву гьуртту хьусса оьрчIайх.