Абхазнал хъуншагьру Сухумилийсса ца кучалун цалчинмур ранграл капитан, Абхазнал миллатрал Виричу, жула лаккучу Аьли Аьлиевлул цIа дизантIий бур. Ва иширая бувсун бур абхазнал СМИ-лул, шагьрулул хъуниминнал укунсса хIукму бувшиву гьанулун лавсун. Гъумучатусса Минкаиллул арс Аьли Аьлиев Дагъусттаннал агьалинан кIулссар сивсусса публицист-политик хIисаврайгу, 1992-1993 шиннардий, гуржиял ва абхазнал дяъви нанисса ппурттуву, Абхазнал республика дуручлай ивкIсса хIаписар хIисаврайгу.
ДакIний бур, нава та ппурттуву Аьлища интервью ласласийни, ина Абхазнал чул циван бувгьуссия тIисса суалданухьхьун жаваб дуллай, мунал увкуна: хъунмасса миллатрал чIивимур миллат азурда буллалини, цIакь чанминнал чул бугьан аьркинссар», – куну. 1993 шинал Абхазиянал республикалул хъуниминнал Ккавкказуллал халкьуннал Конфедерациялухь миннат бувну бивкIун бур республикалун хьхьирил аьрал хIасул буван кумаг бувара куну. Абхазиянал флотилиялул хIасул баврил опыт къабивкIун бур, ва му даву бакIрайн ларсун, Аьли Аьлиевлул аьрали флотгу хIасул бувну, флотрал каялувчишивугу дурссар. Аьли Абхазиянал яла лараймур наградалун Леоннул ордендалунгу лайкь хьуссар. СССР-данул Аьралуннал хьхьирил флотрай 35 шинай къуллугъ бувсса Аьли Аьлиевлул биялсса опытгу, бюхъу-бажаргу бивкIссар.
Вана Абхаз Республикалун ванал чувшивугу, гьунаргу хъама къабивтун, шагьрулул кучалун цIа дизансса хIукмугу бувну. Аьли Аьлиев 1993 шинал увчIуну ивкIссар Ккавкказуллал халкьуннал Конфедерациялул парламентрал председательнугу. Ва уссия лакрал миллатрал «Гъази-Гъумучи» дастталугъ хIасул дурминнавух ва мунил бакIчитуравух. Гъумук ва яхъанай ивкIсса къатрал чIирай ванал цIа чирчусса ула цIакь дурссия 2016-ку шинал. Утти ванал цIанийсса куча бикIантIиссар Абхазиянавугу.
