Апрель зурул 13-нний Аьрасатнал хъуншагьрулий, Москавуллал миллатирттал къатлуву, хьунни Дагъусттаннал гьунар бусса художник, Мудуннул арснал ХIусайнов ХIусайннул дирхьусса суратирттал выставка.
Ва выставка дуван кабакьу бувну бия Москавуллал Культуралул «Дагъусттан» центрданул. Выставка цурдагу хас дурну дия художникнан 85 шин шаврил юбилейран. Ва цувагу Хъунатусса ур. Художник ва педагог ХIусайн ХIусайнов Гжельскаллал паччахIлугърал университетрал магьирлугърал кафедралул профессор ур. 1966 шинал ванал къуртал бувну бур А. Н. Косыгиннул цIанийсса Москавуллал текстильданул институтрал прикладной магьирлугърал факультет. Зий ивкIун ур вава институтравугу, Москавуллал текстиль- трикотажрал производствалул хъунама художникнугу.
Художник барча уллалисса махъ лахълай, «Дагъусттан» Культуралул центрданул президент Арсен ХIусайновлул кIицI лавгунни художникнал творчествалуву агьамсса кIану бувгьуну бушиву дагъусттан темалул, чIявуми произведенияртту зунттал агьулданул колорит аьч дуллалисса бушиву, экспозициялул ца бутIун художникнал «Ттул Дагъусттан» тIисса цIагу хIазран къадирзшиву, ванал живописьрал ва графикалул Дагъусттаннал тарих, багьу-бизу, хIатта цIана бакъасса тарихийсса кIанттурдугума кккаккан буллалишиву.
ХIусайн барча уллалисса ихтилатру бунни Аьрасатнал Жяматийсса палаталул член Айгун МахIаммадовлул, «Дагъусттан» Культуралул центрданул вице-президент Аьппас Аьлишаевлул, Аьрасатнал Президентнал Дагъусттаннал Постпредствалул культуралул отделданул хъунмур Завжат Иманаьлиевал, «Дараччи» фондрал Москавливсса филиалданул хъунмур Мариян Кьаландаровал, «Союз национальностей» тIисса журналданул хъунама редакторнал хъиривчу, искусствовед ПатIимат ХIаммадовал, Гжельскаллал паччахIлугърал университетрал вакил Галина Московскаял, вава университетрал профессортурал ва цаймигу машгьурсса художниктурал, архIал зузиминнал. Выставка дикIантIий дур апрель барз къуртал хьуннин.
