Дагъусттаннал паччахIлугърал университетраву хьунни Ниттил мазрал кьинилун хасъсса ккуркки стол «Глобализациялул ппурттуву ниттил маз ябаву» тIисса цIанилу. Ниттил мазрал сийгу, лахьхьин буваврил давугу ххуйсса даражалийн гьаз дулланшиврул ци буллан аьркинссарив ххал бигьин бавтIминнавух бия Печатьрал ва информациялул министерствалул вакилтал, миллатирттал кказитирттал хъуними редактортал ва журналистътал, преподавательтал ва студентътал.
КIицI лавгсса университетрал проректор МахIаммад ХIасановлул маслихIат бунни, интернетрал, информацион технологиярттал каширдугу ишла дурну, ниттил мазру лахьхьин баврил даву мультимедийный форматрайнгу ласлан.
Печатьрал ва информациялул министр УмархIусман ХIажиевлул, ниттил мазру хьхьичIунмай буллалаврияту ихтилат бикIансса кIанттай, ми ябаврияту гъалгъа тIун багьлай бушиву кьурчIи бизансса иш бушивугу бувсун, чIурчIав дунни ДГУ, так учительтал, филологтал, журналистътал хIадур буллалисса вуз бакъашиву, ниттил мазру лахьхьин баврил даву лахъсса даражалийн гьаз дувансса бияла бусса элмийсса центргу бушиву. Бувсунни университетращал уртакьну зий бушиву, ниттил мазурдил ва литературалул пишакартал бакъагу, уттизаманнул технологиярттугу зузи дан кIулсса касмукартал хIадур буллалисса проектраха.
Филологиялул факультетрал декан Шабан Мазанаевлул бувсунни оьрус-дагъусттан отделениялийн абитуриентътал кIункIу буван ялу-ялун захIмат хъанай бушиву ва миллатирттал группарду гуж-балагь дузал хъанай бушиву. Бувсунни 11 миллатрал мазрал пишакартал хIадур бувайшиву оьрус-дагъусттан отделениялий.
«Мазругу, инсантал кунма, дунияллийн ляхъайссар, инжитгу шайссар, бухгулагайссар. Агар маз инжит хьуну бухьурча, му хъин буллан, уттава буккан буллан аьркинссару, дарув-дарманну ккаклай. Дузал буван аьркинсса масъалартту чансса бакъахьурчагу, бакъассар цамур билаят, жулвамур кунма, ниттил мазурдил бучIантIимунил буруккинттарайсса», – увкунни рутуллал мазрал алфавит хIасул бувсса профессор Камал Жамаловлул.
Дагъусттан мазурдил кафедралул хъунама Муса БахIаммадовлул кIицI лавгунни ниттил мазурдил статус цIакь дуван аьркиншиву, кьатIаллил билаятирттал мазру лахьхьин баврих кунна, къулагъас ххи дурну.
Цаймигу хьунни агьамсса ихтилатру.
