ЦIуссалакрал райондалул бакIчи МахIаммад-ХIажи Айдиевлул, ДР-лул Халкьуннал Мажлисрал депутат Амирхан Амирхановлул, ДР-лул ХIукуматрал бизан баврил масъаларттаха зузисса управлениялул хъунама ХIажи Султановлул, ЦIуссалакрал райондалул мажлисрал председатель Рамазан Маликовлул барча дунни Аьрасатнал Виричу Мутай Исяевлул нину Язимат АхIмадова 8-мур мартрал байрандалущал. Язимат барча бан вай бувкIун бия ваничIан шаппай. ДакIнийн бутан, ЦIуссалакрал РОВД-лул зузала Мутай Исяевлул жан дуллуссар 1999 шинал сентябрь зуруй хьусса дяъвилул иширттаву.

8-мур мартрал кьини Язимат бувсса кьинигу хъанай дур.
Ва кьини ванил оьрмулул 81 шин бартларгссар.
Виричунал ниттил ва райондалул къуллугъчитурал дянив аьчухсса ихтилат хьунни. Вайннал цIухху-бусу бунни ванил багьу-бизулия, дакIнийн увтунни къучагъсса Мутай Исяев.
Нину дакIнийн бутлай дия щаллусса шинай, Мутай я ливтIуминнаву, я уттаваминнаву къаляхълай, цивппа мунах луглай бивкIсса куц.
Так ца шинавар кIул хьусса къучагъну данди авцIуну ивкIсса Мутай боевиктурал сагъну унува увччушиву.

– Арс акъасса, утти ттуна му тачIав къаккаккансса кIул шайхту, на къумашиврул, сси-къащилул пIякь учавай бивкIра. Ттул къюву тачIав лагь къахьунссар. Мутайл махъ кIива оьрчI ливчIссар. Вайннайн я щувкун, рахIат дуккай ттул дакI, — хъювсулну буслай бур Язимат.
Мутайл хъирив Язимат цамагу арснацIа хьуну бур. Дардирал ванил цIуллу-сагъшиврийнгу биялсса асар биян бувну бур.
ЦIана Язимат Новостройрай ялапар хъанай бур. Ванил къатри дур цила арснал цIа дирзсса кIичIираву. Язиматлуха аякьалий бур вайми оьрчIру ва оьрчIал оьрчIру.
Язимат кIирагу байрандалущалгу барча бувну, хъамаллурал барчаллагь увкунни ванихь къучагъсса арс тарбия аврихлу.