Уттигъанну ттучандалия къуркъикачар лавсун увкI­ссияв. Качарданул чIивисса къуршилуву дия 200 грамм. Багьа бия 40 къуруш. ХIисав дур­сса чIумал, ца кило къуркъикачарданул (вайннуйн Ираннал качаргу учай) хъанай дур 200 къурушран. Ца-кIива зурул хьхьичI вайва качарданул ца кило ду­сса пачка бикIайва 95 къурушран. Ванил ци тIиссар? Ванил тIиссар жула оьрму ччянива баян був­сса рынокрал ххуллийх наниссар. Жула инсантурал зумувну учиннуча, базаллувусса хъус цукун дурив, му багьлий дахху-ласулул циняв ишругу наниссар. Аьрасатнал Конституциялий чивчуну бухьурчагу жула хIукумат — му социальныйсса хIукуматри тIий, ва мукъуйн багьайсса ишру циняв щаллу хъанай чIалай бакъар.
Дагъусттаннай, ва мукунма Аьрасатнавугу, инсантурал аьркинлугъру щаллу дуллан цила чIумал хIасул бувну бикIайва «Роспотребсоюз» тIисса идара, жучIава – «Дагпотребсоюз». Дагъусттаннай му хIакьинугу бур. ХьхьичIава «колхозный рынок» тIисса базардугу миннул канилу бикIайва, уттигу бухьунссар. Амма жура кIицI дур­сса шинная махъ вай идарарттал канилу бивкIсса шяраваллаву­сса ттучанну кув бавххуну, кувгу бусса кIанай кьабивтун, лирну ларгун дур ва чулиннайсса даву. Масалдаран, Ккуллал райондалий бакъар Потребсоюзрал цавагу ттучан. Муниятур конкуренция дакъасса чIумал жула ттучаннайсса хъуслил багьри «ракетарттайн» буклаки­сса. Щялмахъ къахьун, Ваччав бур ца ттучан хьхьичIава Райпот­ребсоюзрал ттучанну бивкIсса кIанттай. Амма ттуща кIул буван къавхьунни, та таксса инсаннал ттучан буссарив, юхссагу Потребсоюзрал ттучан буссарив. Вагу ца ссигъа. ТIайлар, тивусса хъус цайми ттучаннайнияр цахъис духьурчагу багьлул яларайсса дикIай.

ХIукуматрал чулухасса вакилтал чIумуя чIумуйн хъус даххултращал хьунабакьлангу бикIай. Миннайн тIий бур, жунма бувагу къабувчIайсса мукъуйну «ретейлертал» . Жунма дакIнийссар уттигъанну, яни шинал ахирданий, жува кIицI бувсса качарданулгу, ххяххияр­ттал нагьлилгу багьри цакуну гьаз шайхту, вай хъуслил яла лахъну бикIан бюхъайми багьри ккаккан бувсса.
Мукуна на гьашину январь зурул ахирданий Дарбантлив ва МахIачкъалалив ххал буллай уссияв ттула даврин аьркинсса Ноутбук. Ххал барча, ттул кислуща мунил багьа гьаз буван къахъанай бия. Яла ялаваймур багьа бия 45-50 азарда къуруш. Бахтти хьуну, Дарбантливсса ца ттучандалий бакIрайн багьуна кислуща бухIан шайсса, 30 азаруннинсса ноутбук.
Жула лакрал бур: «Ттулгу чара бакъар, вилгу иман да­къар» тIисса учала. ХIасил, хIасул хъанай бур суал: «Дуссарив вай жула ттучаннайсса хъуслил багьри ялавай бачин бансса иш-тагьар?» тIисса. Ттун мукунсса ишну чIалан бикIай хIукуматрал тIитIин аьркиншиву цалами ттучаннугу, оьрус мазрай учиннача, «встречная торговля». Ванийну цалсса гъалгъа кутIа банну. ДучIаннав жучIанна, лавай бакъа, багьри ялавай багьлагьи­сса чIун. Умуд къакьукьинну.