Ва нюжмардий, арвахIкьини, А.Къапиевлул цIанийсса Лакрал театрданун 85 шин хъанахъисса юбилейран хасну кIира нюжмардий най диркIсса Миллатрал драматургиялул фестиваль театрданул коллективрал ларкьунни яргсса ва цакьнива тамашачитурал дакIурдил лавсъсса, яруссаннал шаэр Абасил МахIаммадлул «Камаллул Башир» тIисса халкьуннал балайлул гьанулий чивчу­сса спектакльданийну.

---

Ва най бия Оьруснал театрданул хъунмур залданул сахIналий.
Спектакльданул режи­ссер­шиву дурну дур ДР-лул халкьуннал артист Аслан Ма­хIам­мадовлул, хореограф – АьФ-лул лайкь хьусса артист Муса Оздоев, композитор – АьФ-лул халкьуннал артист Ширвани Чаллаев, художник-постановщик — ДР-лул халкьуннал художник Ибрагьимхалил Супьянов.

Спектакльданул премьералия гьарта-гьарзану чивчуну бивкIссар кказитрай хьхьичIва. Гания мукьах, миллатрал театрданул коллективрал захIматран кьимат бишлай, спектакль цимилгу лайкь хьуссар личIи-ли­чIисса бахшиширттан ва тамашачитурал авациярттан. 2019 шинал щала Аьрасатнал миллатирттал фестивальданий жюрилул спектакльданун бивщуссар лахъсса кьимат.
Камаллул Баширдул роль дургьуну ия Аьбдул Мурадов, ганал буттал Камаллул роль – Аслан МахIаммадов, ниттил – Мариннул роль Луиза Шагьдилова.
Ишру най бур 19-ку ттуршукулий яруссаннал ЧIухърал шяраву. Спектакльданул ца­ппара геройтурал тIимуних вичIидиширча, чIалай бур лахъсса зунттал шяраву та чIумала чантI увкусса, аьвзалзаманнул хъаннил чулухуннайсса кьянкьасса аьдатирттайн къарши­сса, миннущал къарязиссагу бивкIшиву.

Камаллул Баширгу хъамитайпалул хIурмат бусса, мунил личностьрал хьхьичI ник рищун хIадурсса, рувхIанийсса ххуйшиврийн мукIрусса жагьил ур. Укун марцIсса щугълурду дакIниву загьир хьусса жагьил шяраву оьбалдаранни тIими ялтту бувккун, щарнил даккаврий маслихIат шай Башир цала бу­ттал Камаллул ивчIан аьркин­ссар тIисса.
Мяйжаннугу, «Ххуйшиврул ва ччаврилли ва дуниял дуруччинтIисса» тIисса мяъна-мурадрал мукъурттил гьанулийсса пьеса бур.

Театрданувун бувкIсса тамашачитуравух ттун хIисав хьуна, синхронсса таржума ишла буллай, спектакльданух щябивкIсса ЧIухърал шяравасса жагьилталгу. Вагу фестивальданул ца цIа дансса, синхронсса таржума ишла баврийну вайми миллатирттал дянивугу Лакрал театрданул сий гьаз дуллалисса иширан ккалли бан бучIисса иш бур.