Зунттал халкьуннал виричушивриясса пьеса

Апанни Къапиевлул цIа­нийсса Лакрал музыкалул ва драмалул театрданул, Миллатрал драматургиялул фестивальданул лагрулий, ларгсса нюжмардий ккаккан бунни С. Кьасумовлул «Оьтту ва макь» тIисса пьеса.

Кувннил хъирив кув театрданул ккаккан буллай бур хъинну бунияласса пьесарду, цивппагу синхрон таржумалущал.
ДакIнийн бутан, ва бур 1877-ку шинал хьусса бунтирай гьур­тту хьуминнал аьпалунсса пьеса. Пьесалул лагрулий сахIналия жунна баллалисса цIарду сайки циняв дур Гъази-Гъумучиял тухумирттаясса, гай тарихирттал иширттаву мяйжаннугу гьурттуну бивкIсса цаймигу лакрал чиваркIуннал цIарду: Парамазовхъул, Къячаевхъул, Рашкъуевхъул, Ккурккуллал Зайду, Будугъал Муси ва чIявусса цаймигу.

ХIакьину, февральданул 12-нний, театрданувун бувкIминнаща ккаккан бюхъантIиссар «Хъамалу оьвча­ву» тIисса хIазсса тяхъасса спек­­такльданул премьера. Байбихьлахьиссар 18:30 ссятраву.