Первенствалул сакиншинначитал хьунни ДР-лул Физкультуралул ва спортрал министерство ва Дагъусттаннал армрестлинграл федерация.
Аьдатравун дагьну, республикалий гьашину ряххилчинни дуллалисса Аьрасатнал Федерациялул спортрал мастер Шяъван Щайховичлул цIанийсса заварду ласаврил Армрестлинграл первенство.
Ва ххуллухсса турнирданий гьуртту хьунни республикалул шагьрурдаясса ва районнаясса 180-ннийн бивсса спортсментурая сакин хьусса 19 команда.
Бяст-ччаллаву арулла жура­сса кIушиврул категориярттаву гьуртту хьусса оьрчIава ва душваврава язи бувгьунни яла итххявхми. Шикку хьхьичIунсса кIанттурду бувгьусса чIава спортсментал гьуртту хьунтIиссар чIал къархьуну, март зуруй, Москавлив хьунтIисса Дунияллул первенствалий.

Армрестлинграл спортрал бяст-ччаллан кьиматру бишлашисса жюрилуву бия Дагъусттаннал армрестлинграл спортрал гьану бивзсса, цикссагу Аьрасатнал спортрал мастертал хIадур бувсса, республикалул армрестлинграл цачIун дур командалул тренер ХIасан Аьли­багов, Аьрасатнал спортрал лайкь хьусса тренер Мурад Идрисов.
Гьашинусса первенствалийгу цалчинсса кIанттурду бувгьунни МахIачкъалалиясса, Каспийскалиясса ва Сулайман-Стальскаллал райондалиясса командарттал.
Шиккува кIицI лаган, пан­демиялуцIун дархIусса тагьаргу хIисавравун ларсун, первенствалий гьуртту хъанахъисса командартту гьарзасса душиврийн бувну, бяст-ччаллу шанма гьантлий лахъи лавгунни.

Первенство нанисса циняв­ппагу гьантрай шикку гьур­тту хьунни Шяъван Оьмаров, Дагъусттаннал Пенсионертурал союзрал председатель АьвдурахIман МахIаммадов, ХIадис ХIадисов ва цаймигу.
ХьхьичIунсса кIанттурду бувгьусса спортсментал барча буллай, Шяъван Оьмаровлул кIицI лавгунни гьунар бусса, итххявхсса жагьилтал аьлтту баву ва ялун нанисса ник спортрахун машхул даву мурадрай дуллалисса давурттах республикалий хъуннасса къулагъас душиву дакI ххари хъанай душиву ялу-ялун чIяву хъанай бушиврия турнирданий гьуртту хьун ччисса ва спорт ххирасса оьрчIру. Барчаллагь увкунни, жагьилтуравун спортрахун багьансса гъира-шавкь рутлай, захIмат бихьлахьисса тренертурахь.
Самболул спортрал дунияллул кIийла чемпион, Дунияллул халкьуннал спортрал мастер, Дагъусттаннал ва Аьрасатнал армрестлинграл спортрал чемпион, Ккуллал шяравасса Оьмаров Шяъван Щайховичлул цIа къакIулсса нажагьсса ухьунссар.

Авадансса ва уздансса бур ванал цалва оьрмулул ххуллугу. Шяъван Щайхович 1998-ку шиная шинай ур Ухссавнил Ккав­кказуллал чулухасса Дунияллул халкьуннал рувхIанийсса цашиврул фондрал президент, Дунияллул халкьуннал рувхIанийсса цашиврул академиялул академик. 2003 шинал ва ­уссия ДР-лул Халкьуннал Мажлисрал депутатну увчIуну. Лайкь хьуну ур Миллатирттал дусшиврул, ЗахIматрал ЯтIул ттугълил орденнан ва цаппарасса медальлан.