Февральданул 24-нний Дагъусттаннал БакIчи Сергей Меликовлул видеоконференциялул журалий дунни Коронавирусрал инфекциялущал талатаврил Оператив штабрал.
Республикалул каялувчинал тIимунийну, гьавалул тагьар оьдикIаврийну чIявусса кIанттурдай левщуну бур чани ва газ. Чани бакъа ливчIун бур агьамсса социал объектру. Сергей Меликовлул дащуй бивхьунни мукунсса тагьар хьун диртсса идарарттал каялувчитал.
Хьусса тагьарданул хIакъираву гьартану бувсунни ДР-лул Хlукуматрал Председательнал хъиривчу Владимир Лемешкол. Мунал бусаврийну, февральданул 23-нний гужсса марч гьаз хьуну, левщун бур чани, бавцIуну бур чIявусса фидерду ва подстанцияртту. Мунияту чани бакъа лирчIун дур 98 шяравалу ва цаппара шагьрурдал районну. Ччясса мутталий чIявусса къатравун буллуну бур чани, миннуха зий бивкIун бур 101 бригада ва 124 техника. Цаппара кIанттурдай вай гьантрайгу зийнма бусса бур.
Республикалул каялувчинал тIимунийну, чIявусса къуллугъчитурал ц1акь къадурунни цайра дирхьусса вихшала.
Владимир Лемешкол бувсунни цуми районнай ва шяраваллаву чани левщун буссарив.
Хьусса тагьарданул хIакъираву ихтилат бунни республикалул прокурорналгу.
Сергей Меликовлул пикрилий, укунсса тагьар шаврил савав хъанай дур къуллугъчитурал чулухасса баччи бакъашиву, минналли кIинтнийн хIадур шаврил жаваб дулун аьркинсса.
«Дагъусттан кIинтнийн хIадур хьуну къабивкIун бур, хIадур шаврил документру кьамул бувну бивкIнугу. На къабитанна хъиривмур шинал му куццуй хIадур хьун. Утти ДР-лул Хlукуматрал Председатель ацIавантIиссар му масъалалул ялув», – кунни ДР-лул БакIчинал.
МахIачкъалаливсса тагьардания бувсунни шагьрулул бакIчи Салман Дадаевлул.
Оперштабрал батIаврий Сергей Меликовлул Владимир Лемешкойн тапшур бунни автозаправкарттай газрахсса ва бензиндалухсса багьри лахъ шаврил хъирив изан.
Республикалул каялувчинал бусаврийну, ми багьри лахъ бувсса АЗС-ирттал каялувчитал жавабрайн кIункIу бантIий бур.
