Ххув хьусса душнил цилла премия «Инсан» фондран ва РувхIаний центрданун дуллунни

Вай гьантрай «Россия – моя история» тIисса тарихий­сса паркраву «МухIаммад Идавсил (с. аь.с) оьрму ва диндалул гьанурду» тIисса лу цуманан ххуйну кIулну бурив ххал буллалисса республикалул конкурсрай ххув хьуми барча бунни.

Дагъусттаннал Муфтиятрал сипталийну хIасул дурсса ва конкурсрай гьуртту хьуну бур мяйазарунниха ливчусса инсантал. Барча баврил шадлугърай гьуртту хьунни Дагъусттаннал национал политикалул ва динийсса иширттал министр Энрик Муслимов, Муфтиятрал председатель Шамил Аьлиханов. Вайннал ххув хьуми барча буллали­сса ихтилатирттаву кIицI лавгунни МухIаммад Идавсил (с.аь.с) оьрмугу, диндалул гьанурдугу ххуйну лахьхьаву агьамсса даву душиву, Идавсихсса (с.аь.с) ччавугу Занная нигь душиврул гьану хъанахъишиву. Цалчинмур кIану бувгьусса ПатIимат Ибрагьимован дуллунни 300 азарда къуруш, кIилчинмур кIану бувгьусса ХIалимат ХIасанован 200 азарда ва шамилчинмур кIану бувгьусса Жамилат Асвадован 100 азарда къуруш. Мукунма хьхьичIунсса кIанттурду бувгьусса 15 финалистнангу дуллунни премияртту ва бахшишру. Цалчинмур кIану бувгьусса ПатIимат Ибрагьимовал баян бунни щаллагу премия дуллалишиву «Инсан» фондран ва цIуну буллалисса РувхIаний центр­данун.