Январь зурул 30-нний ЦIуссалакрал райондалул щархъавусса школарттай байбивхьунни «Большая перемена» тIисса конкурсрал гьурттучитурал сипталийну сакин бувсса «Подружись с антителами» тIисса шаэртурал марафон. Марафондалул лагрулий жагьилтурал ва темалун хасну ляхъан бувсса шеърирдайну бувчIин буллай бур вакцина баврийну инсантурал цIуллу-сагъшиву мюхчан хъанахъишиву. Гьарцагу агьамсса ишираву чялишсса гьурттушинна дайсса ЦIуссалакрал райондалул дуклаки оьрчIал ва ххуллухгу, агьали коронавирусрал инфекциялия буруччаву мурадрай, ххуйсса даву дунни.
Райондалул администрациялул медициналул идарарттан кумагрансса транспорт итадакьаврийн бувну, волонтертал буссия коронавирусрал инфекция дирсса, амбулаториярттай хъин хъанай бивкIсса къашайшалтрачIан уквасса даруртту биян буллай.
Му бакъассагу, ЦIуссалакрал райондалул ЦIуссалакрал шяравусса азарханалий тIивтIуну буссар, вакцинартту ябувансса оборудованиярттащалсса, прививкартту дуллалисса пункт. Вай гьантрай шиккун дуркIунни «Спутник V» вакциналул цалчинмур партия. Райондалул волонтертал хIадурну бур зун кумаг бан. Поликлиникалий тIивтIуну бур консультация дайсса хасъсса пунктру.
Ялавай кIицI лавгсса номердайн оьвкуну, зуща бюхъайссар вакциналул прививкартту дан:
8 928 551 50 79 – А. Кусаева, эпидемиологнал кумагчи
8 928 599 87 67 – Х. Музиева, СaII-центр
8 988 431 76 30 – Э. Мусаева, поликлиникалул каялувчи.
Вакциналул прививкартту дан бюхъайссар «ГосуслугарттайхчIингу». Коронавирусрая буруччаву мурадрайсса вакциналул прививкартту дуллалиссар, 18 шинава ливчусса, вакцинартту бан бучIи къабуллалисса тIалавшиннарду дусса инсантал личIаннин, цинявннайн.
Ялагу кIицI лаган, вакцинартту уквассар ва ми буллалиссар инсантал цивппа рязину.
