Дагъусттан Республикалул КIулшивуртту дулаврил ва элмулул министерствалул тапшур бувну, ДР-лул Элмурдал чIивимур академиялул дурсса «Ребенок в безопасности» тIисса интернет-конкурсрал хIасиллу дунни вай гьантрай. Му конкурсрай 3-сса кIану бувгьунни Лакрал райондалийсса КIундиннал дянивмур даражалул школалул 4-мур классрал дуклаки душ Минажат Аьбдуллаевал.
Конкурс хьуссар Дагъусттан Республикалул паччахIлугърал «Обеспечение общественного порядка и противодействие преступности в Республике Дагестан на 2015-2020 годы» тIисса программалул лагрулий. Конкурсрал агьамми мурадруну хъанахъиссар кIулшиву дулаврил идарарттай дуклаки оьрчIан ххуллул мюхчаншиврул правилартту лахьхьин даву ларай даву, ххуллурдай оьрчIан апатIру шаврил хьхьичIалу кьукьаву. Конкурсрал жюрилуву бивкIссар ДР-лул КIулшиву дулаврил ва элмулул министерствалул, МВД УГИБДД-лул, ДР-лул МАН-рал, ОьрчIал ва чIаважагьилтурал автошколалул вакилтал. Микку гьуртту хьуссар республикалул 10 шагьрулул ва 30 райондалул 650-нния ливчусса дуккаврил идарартту.
Конкурсрал 650-нния ливчусса гьурттучитураву ца хьхьичIунсса кIану жулва душнил бугьаву ххари къахьунсса иш бакъар. Ххув хьусса цинявппагу оьрчIан кунма, Минажатлунгу бахшишран буллунни оьрчIал автокресло. Ва бур дуккавривугу, давривугу итххявхсса, бюхъу-хIарачат бусса душ.
ЧIа тIий буру Минажатлун цIу-цIусса ххувшавуртту!
