Ватан дуруччултрал кьини МахIачкъалалив, Совет Союзрал Виричу АхIмад-Хан Султаннул гьайкалданучIа, бусалардавун агьсса лётчикнал гьунардая бусласисса акция хьунни МахIачкъалаллал шагьрулул мажлисрал бакIчи Марис Илиясов каялувчину. ГьайкалданучIан бавтIун бия МахIачкъалаллал администрациялул мэрнал хъиривчу Запир Алхасов, Жагьилтурал парламентрал депутатътал, жяматийсса ккураннал вакилтал, активистътал, Виричунал буттал шяраваллил агьлу.

Марис Илиясовлул кIицI лавгуна гьарманал бурж бушиву ватан дуручлай бивкIсса вирттаврал аьпа хIурматрай ябуллангу, миннал оьрмулул ххуллурдая, гьунардая ялун нанисса никирахь буслангу.

Запир Алхасовлул бувсуна Къиримнаву, Алупкалий, Виричунан ссуттил цIусса гьайкал тIитIаврий Дагъусттаннал делегациялувух цувагу гьуртту хьушиву.
МахIачкъалаллал администрациялул къуллугърал ветеран, Аьра­сатнал лайкь хьусса строитель Мурта Муртаевлулгу кIицI лавгуна АхIмад-Ханнул оьрмулул ххуллу гьунарданул ва чувшиврул эбратну хъана­хъишиву.
– АхIмад-Хан Султаннул хасиятирттал ххуйшиврул дунияллийцири агьали хIайран бувссар. Чувшиву ххисса ушивруцIун, му инсаншиву дусса, пахру-ххара бакъасса, цала машгьуршиврия ламусравун агьлагьи­сса инсан ивкIссар. Ххувшаврил кьинигу, Виричу увсса ва дунияллия лавгсса кьинирдайгу гьайкалданучIан батIайссар лакрал жямат. ХIакьинусса ба­тIавугу Ватан дуруччайминнал кьинигу батIавансса даврил хъиндайдихьу дуллали­сса давур. Марххала буллали­сса, замгьар бусса кьини духьурчагу, був­ккунни Виричунал гьайкалдануцI тIутIив дишин, на вайннайн барчаллагьрай ура, – увкунни Мурта Муртаевлул.