[dropcap]Я[/dropcap]нварь зурул 25-нний Дагъусттаннал паччахIлугърал медициналул университетрал КIулшиву ласаврил ва инновациялул центрданий хьунни гьарта-гьарзасса пресс-конференция. СМИ-лул вакилтуращал хьунабакьин бувкIун бия: ДР-лул цIуллу-сагъшиву дуруччаврил министр Татьяна Беляева, хъунама санитар хIакин Николай Павлов, Медуниверситетрал ректор Сулайман Маммаев, республикалул хъунама пульмонолог Кьубатай Массуев. Шикку гьуртту хьунни Дагъусттаннал БакIчинал ва ХIукуматрал администрациялул Информацион управлениялул хъунама Рашид Акавов, информациялул ва печатьрал министр УмархIусман ХIажиев, республикалул кказит-журналлал хъуними редактортал ва цаймигу идарарттал вакилтал.
Татьяна Беляевал бувсунни республикалий коронавирусрал къашавайминнал тагьар уттигу къабигьасса душиву ва мунил хьхьичIалу кьукьинсса чарангу вакцинация душиву. Ванил бувсмунийн бувну, бугьарасса ва лахъи ларгсса азардал инжитсса инсантал коронавирусрал цIуцIаврил захIматну къашай буллай бусса бур. Бувсунни Дагъусттаннай цIананин прививкарду дуршиву 709 инсаннал, аьмну 780 азара инсаннал дувансса мурад бушиву.
– Дагъусттаннал 60 холодильник машан лавсъссар, хасну вакцинардан тIий, ми аьркиннийн транспортрай биян баврил шартIругу дузалну дуссар, вакцинарду буллансса 54 пункт тIивтIуну буссар аьмну республикалий, цIуссагу тIитIинтIиссар, даву сантирайн рутаншиврул, – увкунни ванил.
Вара тема аьч дуллай, Роспотребнадзорданул Дагъусттаннаймур управлениялул хъунама Николай Павловлул кIицI лавгунни «Спутник-V» вакциналул 91, 4 процентрал агьали коронавирусрал азардания буручлай бушиву, яни прививка дурсса 100 инсаннавату сайки 91 къашай къахъанай ушиву. Ванал маслихIат бунни жувагу бурувччуну бикIан, жула мачча-гъанмигу, лагма-ялттумигу буруччиншиврул прививкарду дуван. Сулайман Маммаевлул бувсунни коронавирусращалсса талатавриву цува каялувшиву дуллалисса вузран бивхьусса бутIуя 80 сотрудник, преподавательтал ва 600 студент азарханардай зий бивкIшиву. Ва хIакьинусса кьинигу 80 студент ва ординатор «ятIул зоналий» зий ушиву. Ва ялагу, Дагъусттаннал БакIчи Сергей Меликовлул тапшур бувну, вузраву зий бушиву региондалул call-центр ва 12 азарва звонокрахьхьун жаваб дуллушиву му центрданий зузиминнал.
Журналистътурал суаллахьхьун жавабру дуллунни кIицI лавгсса вузрал сотрудниктурал, проректор МахIаммад ХIамидовлул, доцент Саният МахIаммадовал. Минздраврал хъунама пульмонолог Кьубатай Массуевлул балжийну бувсунни вакциналул мюнпатраяту.
– ЧIявусса инсантурал организмалийн биялсса зарал биян буллалисса азар дур, цавай бявкъу-гъили хьусса ххай, азурда къавхьуну буккарчагу ва цIуцIаврива, тайми ххассал хъанай бакъар. Ва азарданун дарув лякъиннин чIунгу аьркинну дур, мунияту буруччинсса цалсса чаран цар бусса – вакцинарду буваву, – увкунни ванал.
