[dropcap]Ф[/dropcap]евральданул 17-нний Дагъусттаннал виваллил иширттал министр Аьбдурашид МахIаммадов хьунаавкьунни республикалул СМИ-лул вакилтуращал.
Министрнал бувсунни ларгсса шинал цалва идаралул дурсса давурттая ва гьарза-гьартасса жавабру дуллунни журналистътурал суаллахьхьун.
Коронавирусрал пандемиялул ва мунил лагмасса тагьарданул хIакъиравусса суаллахьхьун жавабру дуллай, министрнал кIицI лавгунни цила чIумал ва цила низамрай, МВД-лул чулухасса кьянкьа-кьурчIисса тIалавшиннардайну му бала-хатIасса азар дайгьин-дугьан бювхъушиву.
Дагъусттаннай 2020-ку шинал сияхIрайн ларсун дур террористшиврул ххуллий дурсса ва дан дакIний бивкIсса диялсса преступленияртту. Щак бур 150-нная ливчусса инсантал гьуртту хьуну бивкIшиврий дазул кьатIувсса ярагъуннищалсса бандитътурал кьюкьравух, миннавух – хъамигу.
Ашкара бувну бур цаппара кьюлтI хьусса кюрттигу, миннуйн учай «шанаши ячейкартту» куну.
Бизнес-сообществалущалсса дахIавурттал хIакъиравусса ихтилатраву министрнал кIицI лавгунни МВД-лул горячая линиялул жаваб дулайшиву инсантурал ва СМИ-лул циняв лабизавурттахьхьун, министерство мудангу хIадурну бушиву хIала-гьурттуну зун циняв идарарттащал, бизнес лябукку буну зузавугу – му жуйнма цинявннайн багьайсса аьмсса мурадну хъанахъишиву.
Суаллу буллунни МВД-лул ливтIусса зузалтрал кулпатирттал, оьрчI- бакIуннал багьу-бизулул хIакъиравугу. Аьбдурашид МахIаммадовлул бувсунни ми гьарцагу чулуха аякьалийн лавсун бушиву – ка-кумаграл, яхьунсса къатрал, дуккаврицIун ва давурттайн кьамул баврицIун кабакьлай бушиву.
Министрнал аьщуй-ххуттай авцIусса жавабру дуллунни журналистурал цайми-цайми суаллахьхьунгу.
