Жула медициналул вуз зий бур ца шаттирал хьхьичIунну

КIива зурул хьхьичI ДГМУ-лучIа тIивтIусса call-центрданул уттинин ххал диргьуну дур коронавирусрал азардания цIухлахисса ва маслихIатру аьркин хьусса 16 азараксса инсаннаясса телефоннал зангру. Центр тIитIин Оперштабрал батIаврий хIукму бувну бивкIссар ДР-лул БакIчи Сергей Меликовлул.


ДГМУ-лул ректор Сулайман Маммаевлул бусаврийну, га батIаврий жула республикалий регионал центр чара бакъа тIитIин аьркинну бур тIисса ихтилатру гьаз хьувкун, вузрал каялувшиндарал маслихIат бувну бур Сall-центр тIитIин цачIава, цанчирча миву зунсса операторталгу ва цайми-цаймигу шартIру цачIара дузалну диркIун тIий.

– Агьалинащал зунсса, гай­ннал суаллахьхьун жавабру дулунсса оператортал, азар яла къизгъинсса чIумал волонтерталну зий бивкIсса жул студентътал ва ординатортал жучIа хIадурнува бия, цивппагу аьркинсса информация бусан кIулсса. Бия жучIа мукунма центрданул даву щурущи дуван­сса майдангу. Ца ацIва гьантлул дянив хIадургу хьуну, Сall-центр зун бивкIссар цила низамрай,– увкунни цала ихтилатраву ректорнал.

Хьхьу-кьини дакъа щурущисса Центрданий зий ур 60 студент. ХIисав дурну, 16 азардаксса телефоннал занглива 10 азардаксса дусса дур агьалинаясса, лирчIмигу, студентътурал халкьунначIан оьвкуну, гайннащал цIухху-бусу буллалисса.

ХъунмурчIин халкьуннал булайми суаллу бусса бур азар­ханардай кIанттурду бу-бакъашивриясса, дарурттал щаллушиндараясса, азарханалий уттубишин баннин ци бан аьркинссар тIисса. Махъ ппур­ттуву яла чIявуну булайми суаллуну бусса бур вакцинациялия­сса ва прививка дан хьхьичI ци бан аьркинссарив ва дурну махъ ци симптомру ялун личайссарив цIухлахисса.
Консультацияртту дайни оператортурал байсса мас­лихIатругу лавсун буссар Аьрасатнал ЦIуллу-сагъшиврул министерствалул коронавирусрал азарданул профилактикалул, диагностикалул ва ци дарув-дарманну ишла бантIиссарив бусласисса рекомендациярттал методикалия.