ХIакьинусса кьини Дагъусттаннай прививка дурну дур 2600-нния ливчусса инсантуран. Вай гьантрай З. Мирзоевлул цIанийсса ЦIуссалакрал райондалул азарханалий 5 инсаннал дунни прививка. Вайннавасса 4 ур медициналул зузала. Вай хъанай бур райондалий цалчин прививка дурсса инсантал.
Дагъусттаннай махъсса ппурттуву чIаланну чан хьунни коронавирусрал къашавайми.
Ца-кIира нюжмардул хьхьичI гьантлун 150-160 инсан ивкIхьурча къашавайсса, махъсса нюжмардий 80-90 инсан ялун личлай ур.
Щалагу билаятрай кунна, Дагъусттаннайгу январь зурул 18-нния тIайла хьуну дайдирхьунни ковидрая мюхчан хьунсса вакцинация.
ЦIуссалакрал райондалул азарханалий тIивтIуну бур прививкартту дайсса пункт. Ччиманаща бюхъантIиссар терапевтначIа укра осмотр дан ва, антитела ххал бан, оьттул анализ дулун. Прививка дан къабучIи буллалисса кIанттурду бакъахьурча, шиккура прививка дан.
Райондалун итабавкьуну бур 100 доза «Спутник V» вакциналул. ХьхьичIра-хьхьичI прививкартту дантIиссар медиктурал, учительтурал, социал зузалтрал, мукунма райондалул администрациялул ва полициялул зузалтрал.
Жунма чIалай бур коронавирусрая цуксса нигьачIаву дуссарив. Жула билаятрай итабавкьусса «Спутник V» маркалул «Гам-Ковид-Вак» препарат вихшала дишин бучIисса бур. Ва байссар кIийла. КIилчинмур – 21 гьантта лавгун махъ. Цалчинсса прививка дайхтура, инсаннал чурххаву антитела хIасул шайссар. КIилчинмур дайхту, ми хъиннува чIяву шайссар. ХIакинтал бур вакцинациялия цичIар нигьачIаву дакъашиву буслай, азардания мюхчан шаву мурадрай прививкартту дувара тIий.
