Ларгсса арвахIкьини МахIачкъалалив, Дусшиврул къатлуву, хьунни паччахIлугърал органну ва жяматийсса ккуранну уртакьну коронавирусрал азарданун ххуллу кьукьлакьисса масъалартту ххал бигьлагьисса батIаву.
Ва бия Дагъусттаннал Национал политикалул ва динийсса иширттал министерствалул сипталийнусса ккуркки стол. Гьуртту хъанай бия кIицI лавгсса министерствалул хъунама Энрик Муслимов, Дагъусттаннал Жяматийсса палаталул председатель Аьбдулмуъмин Ибрагьимов, министерстварттал ва цаймигу идарарттал вакилтал, динийсса ва жяматийсса ккураннал вакилтал. Минздраврал Медициналул кумаг баврил управлениялул хъунмур Муслимат ХIасановал бувсунни республикалий вакциналул даву цукунсса бущилий най дуссарив.
Ванил бувсмунийн бувну, вакцинарду бувну бур Дагъусттаннай сайки азарунниха ливчусса инсантурал, миннаву кIилчинмур вакцинагу бувсса хъанай ур 300 инсан. Вакцинарду ябаврил ва аьркиннийн биян баврил кьараллу дуруччаврил ялув бавцIуну бусса бур. Ми рефрижератордаву биян бувайсса бур. Бувсунни ЦIунтIиял райондалийн вакцинарду биян бувшивугу. Роспотребнадзорданул управлениялул отделданул хъунама Мурад Рамазановлул бувсунни вакцинарду баврийну 98 процент агьалинал коронавирусрая буруччинсса чаран хъанахъишиву.
[dropcap]Э[/dropcap]нрик Муслимовлул кIицI лавгунни вакциналул мюнпат бушивриясса информацион журалул давуртту гьарза дуван багьлагьисса иш бушиву, прививкартту хушрайсса даву дунугу, мунийну бакъа ва иширава буккансса цамур чаран бакъашиву агьалинан бувчIин буван, буслан багьлай бушиву. Бувсунни хаснува прививкарттайн къаршими жагьилтал бушиву. Жяматийсса ва динийсса ккураннал вакилтуралгу цала ихтилатирттаву вакциналул агьамшивриясса ва мюнпат бушивриятусса тема аьч дунни. Гьанумур ихтилатгу бия паччахIлугърал органнал, жяматийсса ва динийсса идарарттал вакилтал ца хьуну, уртакьну зун багьлай бушиврия, агьали вирусрая ххассал бувансса цамур чаран бакъашиврия.
