Шагьру ччюрклицIа марцI буллай

Шагьру ччюрклицIа марцI буллай

Махъсса сайки ца зурул мутталий МахIачкъала ва жулла республикалул цаппарасса цаймигу шагьрурдал буми масъаларттац1ун ца уттигу ххи хьунни – ча-чунссагу ччюрклил бакIурду. Му чулуха укунмавагу марцIминнул сияхIрал ххуттай дакъасса жулла регион централ каналлал зума-ккарччулунгу дагьунни.


Ва масъала бакIуйн букканнин тIурча, цалла чIунгу, гужгу харж бувну, шагьрулуву ччюрк шайссаксса чан дуван цащава шаймур буллай бур жулва жагьилтал. Миннавасса цагу ур жула лаккуоьрчI, «Волонтеры – Экологи» тIисса щалагу Аьра­сатнал суккушиндарал Да­гъусттаннаймур отделениялул каялувчи, «Городской молодежный центр» МБУ-лул директорнал хъиривчу, ДР-лул Халкьуннал МажлисрачIасса Жагьилтурал комитетрал депутат, Хъусращиял шяравасса Рамазанов Ися ХIабибуллагьлул арс.
Махъсса кIира нюжмардий лув-ялув Ися хIаласса жагьилтал цалва гужирайну, каруннах, чIатIрах, шагьрулува ччюрк ду­ккан дуллай бия. Мукун, январьданул ахирданий ДР-лул Жагьилтурал иширтталсса бувай­сса министерствалул ва республикалул волонтертурал суккушиннардал сипталийну хьусса «Экологический десант» тIисса субботникрал лагрулий вай жагьилтурал хъунмасса захIмат був­ссар. Мукуннассара субботникру хьуссар Дарбант, Каспийск, Къизлар шагьрурдайгу.
Ччюрк шагьрурдава дуккан дувансса цачIара думур техника дуллуссар муниципалитетир­ттал. Субботникрай гьурттушинна дурссар 600-нния ливчусса инсантурал: Республикалул Жагьилтурал иширтталсса бувайсса министерствалул, Жагьилтурал центрданул, ДР-лул Экологиялул ва тIабиаьтрал сурсатирттал министерствалул, МахIачкъала шагьрулул Спортрал, туризмалул ва жагьилтурал иширттал комитетрал ва Шагьрулул жагьилтурал центрданул ва мукунма цаймигу хъинну чIявусса идарарттал, волонтертурал суккушиннардал вакилтурал.
Ва ларгсса бигьалагай кьинигу хьунни укуннасса акция МахIачкъалалив. Мунил давривух мукунма гьуртту хьунни «Зеленое Яблоко», «Киргу» кунмасса хъунисса машлул центрдугу.
– Хьусса бувчIу-къабув­чIурдайн, цалва бигарду къа­тIайлану щаллу буллалишиврийн ва дуллалисса даврихлу буллалисса хIакьлий къабакьлакьаврийн бувну, шагьрулува ччюрк дуккан дуллалисса регионал оператор цалла даврия махъаллил хьуну, даву дацIан дурну, жулва шагьрурду ва хIакьинусса тагьарданийн багьунни. Мунийн бувну шагьрулува ччюрк дуккан дуллалавриха зун багьунни «Махачкала – 1» МБУ-лун – хьхьичIва шагьрулул кIичIиртту бахьлай, марцI буллалавриха зий бивкIсса идаралун. Хасну ччюрклил контейнерду, къуршив гьаз буллансса, кIура баен буллансса техника дакъа, миннан даву дуван ацIлий захIмат хъанай бия .
Ца-ца «Камазрал» шан-шанна тоннаксса ччюрк ца кьини дуккан дурссар. Хъинну чIявусса идарартту, жагьилтал хIала бувххунни ва давривух, миннавух жулва лакрал жагьилтуралгу «Вирттал» суккушиннагу.
Ччюрклищалсса даву тIааьнми, бигьами давурттавасса дакъар, укунсса давриха зунгу ччи-ччинан къаччанссар. Жулла республикалун ва хъун-шагьрулун укун бигьа дакъасса чIумал кумаг буван рязи хьуминнан хъунмасса барчаллагь. Гьай-гьай, ваксса хъунмасса шагьрулуву уттигу хъинну чIявусса ччюрклил бакIурду ливчIунни, шаймур уттигу буванну, шагьру марцI бавриха зузисса идарарттан кумагран. Умуд бур ва масъала ччясса мутталий щаллу хьун­ссар тIисса, – тIий ур Ися.

Читайте также: