Вай гьантрай Дагъусттаннал паччахIлугърал медициналул университетрал стоматологиялул хирургиялул кафедралул преподаватель, ДГМУ-лул студентътурал цала каялувшиврул ва жагьилтурал сиптарду хьхьичIуннай даврил секторданул каялувчи Нариманнул душ Милана Юнусова лайкь хьунни коронавирусрал пандемиялул чIумал агьалинан медициналул кумаг баврихлу ва къашавай хьуминнаха аякьа даврихлу Дарья Севастопольскаял цIанийсса медальданун. Гьунар бусса жагьилсса специалист Милана Юнусова бур ЦIуссалакрал райондалиясса.
Дарья Севастопольскаял цIанийсса медаль хIасул дурну дур уттигъанну, июль зуруй 2020 шинал. Ва медаль дулун ккаккан бувну бур Аьрасатнал ЯтIул Ххачлил иширттавух чялишсса гьурттушинна дуллалисса медициналул зузалтран. Дарья Михайлова бур хьхьичIавасса аьрали медсестрахъавасса цIимилул ссу, 1853-1856 шиналсса Къиримнал дяъвилий Севастополь буручлай бивкIсса вирттавравасса. Ванил сурат дирхьусса медработниктурансса наградалий дур «ДакI цIимишиврухлу»тIисса чичру. Ва награда дулайсса дур шинай 20 инсаннан.
Шиккува кIицI лаган, Милана Юнусова буссия коронавирус дайдирхьусса цалчинсса гьантрайва къашайшалтран медициналул кумагру буллай, аякьа дуллай.
Аьрасатнал ЯтIул Ххачлил Президиумрал чулуха бюхттулсса наградалун жулва лаккудуш лайкь шаву ххари хьунсса ва пахру бан лайкьсса иш бур.
Ларгсса шиналгу Миланан дуллуссия Аьрасатнал Президент Владимир Путиннул чулухасса медаль, Дагъусттаннал БакIчинал ва Жагьилтурал министерствалул чулухасса Барчаллагьрал чагъар.
ДакIнийхтуну ххариссару ва хъунмасса умудрай буру гихунмайгу Миланал бюхъу ва гьунар хъиннува итххяхханссар тIий.
