Уттигъанну МахIачкъалалив хьусса шагьрулул субботникрай гьурттушинна дурунни «Лезгинка» ансамбльданул коллективралгу. Му давривух къавтIалтрал коллективрал чулуха 30-нния ливчу­сса инсантал гьуртту хьунни – къавтIалт ва цаймигу зузалт. Артистътуран кумаг буллай бия марцIшиву дуван миннал язи бувгьусса кIанттул лагма-ялтту ялапар хъанахъисса инсанталгу.
Ансамбльданул каялувчи Жамбулат МахIаммадов оьвчаву дуллай ур шагьрулул ва республикалул цаймигу идарарттайн, укунсса давур­ттавух хьхьичIунсса гьурттушинна дувара тIий.
— Хъунмасса барчаллагь­рай ура ттулва коллективрайн, бигьалагай кьини душиврух къабурувгун, цала хушрай бувккун, укун­сса даву даврихлу. Хъинну кьутI­лай дур ва хIакьинусса сурат, шагьру ва хIалданийн бутаву, – тIий ур Жамбулат МахIаммадов.