ФестивальдануцIунсса пьеса

Ларгсса нюжмардул ахирданий А. Къапиевлул цIанийсса Лакрал музыкалул ва драмалул театрданул сахIналий ккаккан бунни Миллатрал драматургиялул фестивальданул лагрулийсса ирглийсса пьеса – Валерий Эфендиевлул «Хъин хъамаличу» («Баран на балконе») тIисса къямадия.
Ва хъанахъиссар Лакрал театрданун 85 шин шаврил таварихран хас дурсса Миллатрал драматургиялул фестивальданул лагрулий ккаккан буллалисса шамилчинсса пьеса.

---

 

Къямадия куну ца мукъуйну учирчагу, му журалул пьесарду бикIай личIи-личIисса – инсан гьарца кьинисса, ичIаллилми тIий, даврилми тIий, къайгъурдая игьалагансса, ялттутувасса, хъянсса, куклусса, бикIай тамашачи, хъяхъи аврищал, чIяву-чIявусса затирттал ялув пикри буллали уллалисса, куртIсса мяъналул бувцIусса. Муна мукунсса бия ва ххуллухмур къямадиягу, цилгу, тамашачинан кIукъабизанну, лаласун захIмат къахьунну, мунищала архIал дакIнил куртIнийн щунну, цимивагу масъала гьаз буллалисса: ниттил маз буруччаврил, жулла ляличIишиву, цайминнаха къалащаву дуруччаву (миннувух инсантурал миллатрал цIардугу, кутIа къадуллай, ухчIинларайну кIура даен къадуллай, Майсаратлуя – Мая, Къисттаманнуя Катя къабуллай тIисса кунма), чIахху-чIарахнал кувннал кувннащал­сса хIала-гьурттушиврул, бухху-буккаврил, кувннал кувннан кумаг баврил, чIарах бацIаврил. СахIналия баллалисса махъру, калимартту дия афоризмарттан кIанттай ишла дуван бучIисса, оьрмулуву чIявуну хьунабакьайсса масъаларттацIун дархIусса.|

«Зу къатIайлану ялапар хъанай буру. Зун кIулну бакъар зула чIаххуврачIа хъанахъимур, чIаххуврайсса бивкIу-букку. Зу зунттая ялавай, кьанив, шагьрулийн, бувчIун най буна дакъа дурну дур жулла аьдатру. Зун къадакIнийрив зунттавусса аьдат­ру – вил хъатIи – ттул хъатIи, вил къумашиву – ттул къумашиву!?» – тIий, шагьрулул инсантуран цалва къатрал чIирттал тийх цу ялапар хъанай уссарив, цалва квартиралул нузал кьатIув ци хъанай буссарив къакIулшиврий, чIаххувва-чIарав ялапар хъанай бунугу, кувнная кув ятсса шагьрулул инсантурай махIаттал хъанахъисса, Лаккуя шагьрулийн увкIсса хIухчу Ашрапов (Шамсуттин Къапланов). Му ялагу тIий ур, шагьрулий цала уссил арснал чIаххуврай нину ялув дакъана буттал цалвалу душ хъунма буллалисса, мунан утти мунил хъатIи баврил буруккингу бусса бавну: «ОьрчI – му хъува бакъархха, аьрщаравун бувтун, цийнува цуппа хъунма шай­сса», – тIий.
Пьесалуву ялагу дащуй дирхьуну дур инсаннал лащинми хасиятирттавасса ца – цанма ссаву ци буссарив кIул къавхьуна, хъирив къалавна, цама инсанная най буна оьккисса пикри баву, инсантурал кувннал кувннайнсса вихшала кьукьаву.

Пьеса синхрон журасса таржумалущалсса буну, ва кьини театрданувун бувкIун бия цайми миллатирттал вакилталгу. Миннавух бия Аьрасатнал, Европанал ва Дунияллул паралимпий чемпионка Сакинат МахIаммадовагу:
– На цалчинна Лакрал театрданувун бувкIсса. ДакI дар­цIуну бура ванияр тихунмай цимилвагу бучIантIишиврий. Пьеса хъинну ххуй бивзунни, диял­сса хъяхъаву дував, бигьалавгра. Барчаллагь, ттуйн театрданувун оьвкуну, ттун Лакрал театрданувунсса ххуллу ккаккан бувсса Луиза Шагьдилован, — тIий бур Сакинат.
Фестивальданул лагрулий уттинин ккаккан бувсса циняв пьесардайн бувкIунни ГьунчIукьатIрал шяраваллил ккурандалул вакилталгу. Вайннал дачин дурну бур, шяраваллил инсантал цачIун хьуну, архIал театрданувун заназисса, ххаллилсса аьдат, цайми-цайми шяраваллалгу, цалла ккуранну дунугу-дакъанугу, эбратран ласунсса. Ва кьинигу бия ккурандалул бакIчи ХIажибутта ХIусайновлущал бувкIсса биял­сса делегация.

– Театрданул, мазрал чIарав бацIаву жулва буржри. Жува, лак, укунмагу чансса буру, маз хъамабитлай бур, му лахьхьинсса шартIру шагьрулий чанну дур, мунияту жува, жулва оьрчIругу бувцуну, занан аьркинссару театрданувун. На, та-ухьурчагу, бюхъавай хIарачат бувара жулва театрданувун уккавансса. Ва ххуллухрив жу, «Къалайчитурая» байбивхьуну, фестивальданул лагрулий ккаккан буллалисса цавагу пьеса къакьабитарду, шярава чара бакъа 10-15 инсан уссар, – буслай ур ХIажибутта.
Пьесалул режиссер – Ислам Казиев. Художник – Арслан Мурзабеков.