Прививкартту дансса бригадартту сакин бунни

Дагъусттаннай сакин буллай бур, кIантту-кIанттурдайн лавгун, агьалинаву вакцинация дансса бригадартту. Дагъусттаннал цIуллу-сагъшиву дуруччаврил министрнан кIанайсса Татьяна Беляевал бусласимунийн бувну, цIанасса чIумал укунсса ацIва бригада сакин бувну бур, аьркин багьларча, ххишалагу бансса пикри бур.


Цайми министерстварттащал ва ведомстварттащал ххал бивгьунни вакцина бан ччиманахь цIухху-бусу баврил, бригада бучIансса чIун ккаккан даврил масъалартту.
Машан лавсун бур 60 микI­лачIулул камера. Мунийн бувну тIитIин бювхъуну бур 54 пункт. Лавсун бур мукунма вакцинарду ца кIаная ца кIанайн ласлансса кIива рефрижератор.
Министрнал бувсунни архсса райондалул агьалинал вакцинация дан ххишаласса пунктру тIитIин дакIний бушиву.

Ванил бусласимунийн бувну, хIакьинусса кьини Дагъусттаннай 709 инсаннал дурну дур коронавирусрая мюхчан хьунсса прививка. Пикри бур 700-800 азара инсаннал вакцинация дансса.
Махъсса цаппара гьантрал дянив республикалий коронавирус душиврий щак бусса 94 инсан азарханардай уттуишин увну ур. Аьмну цIана азарханардай ур коронавирусрал къашавайсса 2411 инсан.

Республикалул оператив штабрал бусласимунийн бувну, Да­гъусттаннай коронавирусрал инфекция дусса 27352 инсан цIуну ялун личин увну ур.
Пандемия дайдирхьуния шинмай республикалий коронавирус дирсса 1219 инсан ивкIуну ур. 24116 инсан хъин хьуну ур.