Республикалий марцIшиву даву мурадрай баян бувсса «Экологиялул десант» акциялувух хIала бувххунни МахIачкъала, Каспийск, Къизлар ва Дарбант шагьрурду. Акциялул лагрулий 380-нния лирчусса тонна ччюрклил экьи дирчуну дур. Аьмну акциялуву гьуртту хьуну ур 600 инсан, зузи дурну дур 121 техника.
[dropcap]М[/dropcap]ахIачкъалалив марцIшиву дуллалисса давуртту дайдирхьуну дур Октябрьданун 50 шин шаврил цIанийсса паркраву. Шикку гьуртту хьуну бур Дагъусттаннал жагьилтурал иширттал министр Камил Саэдов, мунал хъиривчу ПатIимат Оьмарова, МахIачкъалаллал спортрал, туризмалул ва жагьилтурал иширттал комитетрал председатель Марат Ибрагьимов, Жагьилтурал иширттал министерствалул зузалт, «Вирттал» цIанилусса лакрал жагьилтурал ккурандалул ва цаймигу жяматийсса сакиншиннардал вакилтал.
– Махъсса ппурттуву Дагъусттаннай ччюрк экьи дичаврил масъала захIматсса тагьарданий бур, жунма чIалачIисса куццуй. Мунийн бувну, Дарбант, Къизлар ва Каспийск шагьрурдал администрациярдащал жун укунсса акция баян бан дакIнийн багьунни. Ва давриву гьурттушинна дурссар мукьва шагьрулул жагьилтурал комитетирттал ва волонтертурал кьюкьрал. 10-15 инсан цачIун хьусса бригадарду бувну, марцIшиву дуллай бивкIссар, – бувсунни Камил Саэдовлул акциялул хIакъираву.
