[dropcap]В[/dropcap]а нюжмардий «Дагестанская правда» кказитрал редакциялий ДГМУ-лул лахъай азардал кафедралул хъунмур, ДР-лул ЦIуллу-сагъшиву дуруччаврил министерствалул штатрай бакъасса хъунмур инфекционист Елена Арбулиеващалсса пресс-конференция хьунни. Хьунабакьаврил мурадгу бия хIакьинусса кьини республикалий вакцинация цукун най дуссарив, му вакциналия гьарта-гьарзану ва коронавирусрал азардануцIун дархIуну цIана аьмсса тагьар цукунсса дуссарив бусаву.

Елена Арбулиевал бусаврийну, хIакьинусса кьини республикалул азарханардай сакин дурну дур азарданущал талансса цIакьсса низам. Биялну бусса бур къашайшалт уттубишин бансса кIанттурду ва миннаха аякьа дансса пишакартал. Щаллуну дусса дур дарурттал луртангу.

Вакцинациялул хIакъираву штатрай бакъасса хъунмур инфекционистнал бувсунни хIакьинусса кьини жулла республикалий прививка дуршиву 4,5 азара инсаннал ва цала хушрай му дан рязисса агьлу гьантлия гьантлийн чIяву хъанай бушиву.

«КIицI банна вакцина бан рязиминнава махъ ппурттуву гьарзасса бушиву оьрмулул бугьарасса халкь. Цуппа вакцина бан ккаккан бувну буссар оьр­мулул 18 шин хьуминная гихунмай. Вайксса халкьуннайн вакцина бувну, уттигу цуппа ца иш хIисав къавхьунни, медициналул мазрай тIийкун, «побочные явления» хьусса. Вагу жула аьлимтурал буккан бувсса вакциналул лахъсса даража бушивур»,– увкунни ванил.

Елена Арбулиевал бусаврийну, жулла республикалий хIакьинусса кьини щаллу бувну бур, вакцина бишинсса, му ябуллансса кIанугу. Му бу­сса бур хасъсса шартIругу дусса, аьркинсса температуралул, низамрал щаллушинна дусса, аптекалул склад кунмасса идара.

КIицI бунни ванил коронавирусрал азар сававну ва ларгсса ссуттил, агьали цала цивппа мюхчан бувну, бурувччуну, чIявусса халкь бусса кIанттурдай маскардаву занай бивкIун тIий, чанну къашавайсса бивкIшиву укуннасса гриппрал ва ОРВИ-лул азардалгу.
Ва иширалгу тасттикь буллай бур, хIакинтурал тIимургу лалавсун, миннал буллалисса маслихIатирттах вичIи диширча, лахъай азардая буруччин жула жувагу бюхъайсса бушиву.