«АхIмад-Хан Султаннул оьрмулул ххуллу – му лахьлан аьркинсса тарихри»

Лаура Бакриева

Ларгсса арвахIкьини Да­гъусттаннал Жагьилтурал центрданий республикалул БакIчи Сергей Меликовлущалсса хьунабакьаврий гьуртту хьунни АхIмад-Хан Султаннул цIанийсса фондрал хъунмур, 1-мур ЦIувкIратусса Лаура Бакриевагу.

Ванил бувсунни Совет Союзрал кIийла Виричунал 100 шинал юбилейран хасну ЦIуминалий ва Къиримнаву цIусса гьайкаллу тIиртIушиву ва цуппа каялувшиву дуллалисса фондрал сипталийну Лакрал театрдануву ва тарихийсса паркраву-музейраву дур­сса давурттаяту.

Буллунни Меликовлухьхьун суалгу, Дагъусттаннай аьрали частьругу духьувкун, оьрчIру патриот зумувну тарбия баву мурадрай, гъинтнил каникуллай экскурсиялий ми частирдавун буцлансса чаран лякъин къабучIиссарив тIисса, дуллунни мунахьхьун Виричунал сурат дусса, хъазамрай лачIай значокругу. Меликовлул кIицI лавгунни АхIмад-Хан Султан къуллугъ буллай ивкIсса ист­ребительтурал гвардейский полкрал тарих жагьилтурал, зана-зана бикIлай, лахьлан аьркин­сса тарих бушиву.