«Да, бияхха дакIнихь цирив бусласисса лахIза!»

Шалклувусса барз

Уттигъанну на ссаллив, кIункIу увну, кIюрххицIунай (чани хъананнин) шания изан увну, кьатIув уккан увнав. Ба­къая ссавний цIуртти чIалай. Ссав цурдагу яруннин дахьра-дахьра хIисав хъанахъисса ттуруллал хьхьемал кIучI дурну дия. Амма ттул янилун дагьсса сурат дия хъинну караматсса: ссавнийсса зурул лагма бия хъунмасса, ссурулккуртлуха лахьлахьисса, лагрулул чулуха саргъунсса шалкка хьуну. КIа шалклуй дия Аьссаххуллул куннасса, чаннану кIяласса лишан. Да бияхха дакIнихь цирив бусласисса лахIза. На махъунай къатлувун зана хьуну, фотоаппарат лавсун, сурат ришлан ивкIра. Амма ттул фотоаппаратрал гуж биял къавхьуна, кIа шалклул вив лавсъсса зурул сурат ххуйну рищун. Цукун духьурчагу на суратмур рирщуссия, хьусса кьяйдалий дикIанссарча куну.

Ва иш ттун чIалан бивкIуна га кьини щиллив, циваннив ттунна дуллусса бахшишну. Укун­сса ишру инсантурал оьрмулуву шайсса бур. На буккав шаппай бучIан байсса «Литературная Россия» кказитрай, дунияллул гъунттулу душиву, жунна кIулсса 4 дакъассагу, ялагу 8 лагру, яний 12 лагру. Инсаннал няраща лаласун бюхъайсса бу­сса бур 11 лагру.

Ялагу шеърирду чичайсса инсаннан аьркинну дикIайсса дур 9 лагру, Аллагьнал буллу­сса пагьмулийри ми чичайсса ва ляхъан байсса тIурчагу. Пушкиннул, Лермонтовлул, Некрасовлул шеърирду ахттар бувулт буслай бур, гайннайн гай шеърирду арулчинмур ссавнияту ликкайсса бивкIссар тIий. Буслай бур Менделеевлун цалла таблица цукун данссарив, цумур элемент цумунил хъирив дишинссаривгу макIра ккарккун диркIссар тIийгу.

Мугурхха аьлимчунан чарив тIайла дурксса бахшиш. Мунияту лагма хъанахъимуних жува буруглан багьлай бур хъинну личIлулну. Му личIлулшиврул авадан дуллай дур жунна Аллагьнал итадаркьусса кьинирдугу, ссятругу, лахIзардугу. Ябитлатияра лагма-ялттусса караматшивурттах, дакIнил мутта тирх учин буллалаврих.