ХIадур хъанай бур социал объектру тIитIин

Февральданул 22-нний ДР-лул ХIукуматрал председательнал цалчинма хъиривчу Батир Эмеев ва хасъсса къуллугъирттал каялувчитал бивунни Хасавюртуллал райондалий «Аьрали строительствалул управление» ФГУП социал объектру дуллалисса кIанттурдайн.

ХIукуматрал делегациялул цалчин ххал бувну бур Эндирейауллай 300 дуклаки оьрчIансса школа ва 120 чIивитIунсса оьрчIал багъ буллалисса кIанттурду. Багьайсса бигардугу бувну, строительство нанисса куцгу ххал дурну, къуллугъчитал лавгун бур Кандаурауллай 300 дуклаки оьрчIан буллалисса школалул ялтту буккан. Хасавюртуллал район республикалий ца яла хъуннасса, чIявусса агьали яхъанахъисса район духьувкун, щархъаву школартту, садикру биял къахъанахъисса масъала яла цIурювкьумур бу­сса бур. ЦIусса школартту буллай бусса бур уттизаманнул стандартругу, шартIругу дузал дурну. Буллай бусса бур миннуцIунсса спортзаллугу, аудио, видео ва светоаппаратурагу дусса кабинетру ва батIавурттал заллу. Машан ларсун, щаллушинна дувантIиссар миву дишин­сса цIусса партардал, шкафирдал ва цайми матахIралгу. ОьрчIал мюхчаншиву дуруччинсса мурадрай школарттал хIаятирттаву бишинтIиссар видеонаблюдениялул камерарттугу. Эндирейауллай буллалисса школалий бишин хIадур буллай бусса бур зана-кьала хьун захIматсса, цIуллу-сагъшиврул ссуссукьусса агьалинансса лифт. Мукунма бувантIиссар уттизаманнул спортрал майданнугу. ОьрчIал багъ тIурча, шяраву хIакьинусса кьини сайки бувну, къуртал шавай бусса бур. Му тIитIинтIиссар гъидайдихьулий, июньдалул 1-нний.