Хъювхъиялгу, щала райондалулгу агьалинал дянива лавгунни къаугьарасса оьрмулий Сулайманов Саэд ХIаснил арс.
Райондалул администрациялул бакIчину ва зий уссия 12 шинай, цал муниннин 6 шинай зий уссия бакIчинал хъиривчунугу.
Саэд ия ччарча оьрмулуву, ччарча политикалуву за бувчIусса, чантI увкусса инсан. Ванал ляличIисса аякьа дия райондалул агьалинал социал-культуралул ара ххуй даврих, кIулшиву гьаз даврих, цIуллу-сагъшиву дуруччаврих.
Ва ия ххаллилсса строительгу, райондалул щархъавусса стройкардал объектру баврил ялув республикалул хъуниминнайн уккайва. Ца Ккуллал шяраву, ца райцентрданий Саэдлул бан бувуна кIи-кIира зивулийсса типовой школартту. Ттун дакIний бур, Ккулув школа тIитIин бувкIссия Дагъусттаннал Президент МухIу Аьлиев, дуккаврил министр ва чIявусса цаймигу къуллугъчитал.
Ххуйсса капитал ремонтру дуруна Ккуллал ва Хъусращиял шяраваллал оьрчIал багъирдал, ЧIяв, Хъювхъав сакин бувуна школа-садикру.
Саэдлул хъуннасса къулагъас дайва райондалул жагьилтал, дуклаки оьрчIру спортрахун бичаврих, щархъаву спортзаллу баврих. ЧIярусса шинну хьуссия Хъусращиял шяраву ФОК (Физкультурно-оздоровительный центр) батIин къахъанай, му зузигу бувну, спортшколагу бувссия Хъусрахь. Ккуллал шяраву бувссар кIива спортзал. Мукунма ЧIявгу, Вихьливгу зий буссар спортзаллу. Райцентрданул майдан бакьингу бувну, асфальтгу бавкьуну, ххаллилсса сахIнагу бувну, АхIмад-Хан Султаннун дацIан дурссия гьайкал.
Хъювхъиял шяраву балайрдал, 1-мур ЦIувкIрав пагьламантурал фестиваллу дурссия.
Райондалул агьалинал цIуллу-сагъшиврул цIаний арулла шяраву зузи бувна ФАП-ру. Райондалул хъунмур азарханалух, гивусса зузалтрах къулагъас дайва. Ваччав тIивтIуссия кIива аптека.
Ккуллал шяраваллил лултту чулийсса Хъун-Неххайхсса ламу цимийлагу аьтарттал бувгьуну, Ккуллал фермардайнсса ххуллу лакьайва. Хъинну ххуйсса ламу бан бувссия кIикку. Мукунма лайкьсса ламу бувссия Ккуллал шяравугу.
ХIасил, ххинугу къачансса давуртту дурссар райондалий ванал каялувшиврий.
Чурххал мушакъат хъанан икIайхту, аьрзагу бивхьуну, кьадиртуна хъунамашиву.
Дан дакIний ивкIун, Саэдлуща дуван къархьунура лирчIминнул, ялун ххуй-ххуйсса, цIу-цIусса цаймигу давуртту щаллу дуллай, хIарачатгу, бюхъугу ххину зий ур хIакьину райондалул жагьилсса бакIчи Шамил Рамазанов. МунацIунгу Заннал кабакьиннав тIий ура. Мукунма тIий бухьунссар Ккуллал райондалул жяматгу.
Ахирданий ца затгу ххи бан ччай ура: ттухь цIуххирча, къабяйкьинссия республикалулгу, райондалулгу хъуними, райадминистрациялул чIирай лахъарча Саэдлул аьпалул ула.
МахIмуд Аьлилов,
ш. СунбатIул
