Лайкьсса кьимат

Вай гьантрай Москавлив хьусса «Эстафета вузовской науки – 2021» тIисса цIанилусса щалагу Аьрасатнал элмийсса-практикалул мероприятиялий «Онкологиялул аралувусса клиникалул ххал бигьавуртту» тIисса номинациялий 1-мур кIану бувгьунни Дагъусттан Республикалул Онкоцентрданул маммологиялул отделениялул каялувчи, Ажублул арс Мирза Мурачуевлул.

Февраль зурул 8-нний Москавлив Сеченовский университетраву хьусса «Вузовская наука. Инновации» тIисса Дунияллул халкьуннал медициналул форумрал даврил лагрулий хьунни ххув хьуми барча буллали­сса шадлугърал мажлис. Микку гьуртту хьунни республикалул Онкоцентрданул хъунама хIакин Владимир Брежнев. Ххув хьусса хIакинтуран наградартту дуллунни АьФ-лул цIуллу-сагъшиву дуруччаврил министр Михаил Мурашкол.
Республикалул Онкологиялул центрданий уттинин къабуллай бивкIсса, хъазамрал дурухлу хъин дуллалисса операция цалчин буван бакIрайн лавсъссар жагьилсса хIакин-онколог, Ккуллал шяравасса Мирза Мурачуевлул. КIилчинмур даражалул дурухлу дусса хъамитайпалул хъазам сахла бувну, онкопластикалул операция був­ссар ванал.
ХIакьинусса кьини хIакин-онколог, дерматоскопиялул пишакар Мирза Мурачуевлул цIа машгьурну дур, Дагъусттаннай да­къассагу, республикалул кьатIувгу.