ХIакьинусса кьини Дагъусттаннай буссар коронавирусраясса вакцинация дувайсса 60 пункт. Ми тIивтIуну буссар МахIачкъала шагьрулул поликлиникарттал базалий, мукунма районнал ва шагьрурдал азарханардай.

Миннул ккал 80-ннийн лахъан дувантIишиву буслай бур ДР-лул цIуллу-сагъшиву дуруччаврил министрнал буржру чIумуйну биттур буллалисса Татьяна Беляева.
– Жу хIарачат буллай буру коронавирусраясса вакцинация агьалинан шайссаксса бигьану рахIатну дуван. Му мурадрай, февраль зурул ахирданийннин вакцинация дувайсса 20 пункт уттигу тIитIинсса пикри буссар, – тIий, буслай бур ва.

Шиккува дакIнийн бутан, ДР-лул ЦIуллу-сагъшиву дуруччаврил министерствалул лавсъссар коронавирусрал вакцина ябуллансса ялунсса 20 дякъил камера ялагу. Ми бачIинтIиссар вакцинациялул пунктру тIитIин нанисса медициналул идарар­ттайх. ДукIу лавсъссар 60 уттизаманнул холодильник – хасъсса шартIирдай ябуллан аьркинсса «Спутник V» препаратран.
Татьяна Беляевал ялагу ххи бунни:
– Вакцинация – му укра ва хушрай дуллалисса давур. Мукун бунугу, инсантуран цанмагу бувчIин аьркинссар прививка – му вирусрая цивппагу, цалва гъан-маччамигу буруччинсса ца яла мюхчанмур чаран бушиву, – куну.