Январь зурул 18-нний региондалийсса «Справедливая Россия» партиялул отделениялул приемнайлуву агьали кьамул бунни Дагъусттаннал парламентрал вице-спикер, «Справедливая Россия» партиялул фракциялул каялувчи Камил Давдиевлул. Ванащал агьалинал масъаларттах вичIи дирхьунни ДР-лул Халкьуннал Мажлисрал Строительствалул, ЖКХ-лул, транспортрал ва связьрал комитетрал председатель Мурат Маммаевлул.
Депутатнал кьамул бувсса агьалинавасса ца бия ЦIуссалакрал райондалиясса ЦIуссаккуллал шяравасса Полина Халилова. Ва бувкIун бия цинна даву лякъин кумаг бара тIисса тавакъюращал. Жунма цинявннан кIулсса куццуй, Полина зий бивкIссар ЦIуссалакрал райондалул связрал хъунмурну. Ванил масъала щаллу баврил хIакъираву Камил Давдиевлул оьвкунни ЦIуссалакрал райондалул хъунама МахIаммад-ХIажи Айдиевлуйн. Райондалул бакIчиналгу махъ буллунни кутIасса чIумул мутталий Полина Халиловал мурад щаллу бансса.
Хъирив депутатначIан кумаграл хIакъираву оьвкунни МахIачкъалалив ялапар хъанахъисса Шамил ХIабибовлул. Ванал бувсунни цува Чачаннал дяъвилул иширттаву гьуртту хьуминнал сияхIрайсса льготартту ишла бувну булайсса къатри ласун къахъанай ушиву. Мурат Маммаевлул бувсунни ванал масъала депутатътурал щаллу бан аьркинсса къайгъурдал сияхIрайн ласунтIишиву.
Вара кьини депутатътурал кьамул бунни личIи-личIисса масъаларттал хIакъираву кумаг тIалав буллай бувкIсса цаймигу инсантал.
