Декабрьданул 29-нний ДР-лул БакIчи Сергей Меликовлул сакин дурунни ДР-лул цIусса ХIукумат.
Цала хIукмулиийну Республикалул Каялувчинал ДР-лул ХIукуматрал Председательнал цалчинма хъиривчуну ивтунни Нюсрет Оьмаров, муниннин му зий ивкIссар ДР-лул БакIчинал ва ХIукуматрал Администрациялул каялувчинал хъиривчуну. Республикалул цалчинма вице-премьерну ивтунни Батир Эмеев, ттинин му зий ивкIссар ДР-лул промышленностьрал ва машлул министрну.
ДР-лул ХIукуматрал Председательнал хъиривчутурал буржру чIумуйсса бартбигьлагьимину бувар Анатолий Карибов, Владимир Лемешко, Аьвдулмуслим Аьвдулмуслимов. Цалва къуллугърайва ливчIунни республикалул вице-премьер Рамазан Жяъпаров. ДР-лул ХIукуматрал Председательнал цамагу хъиривчуну ивтунни Муслим Телякавов.
Дахханашивуртту хьунни республикалул цайми идарарттайгу. ДР-лул аьрщарал ва хъус-хъиншивурттал арардал министрну ивтунни Заур Эминов, ТIабиаьтрал луртаннал ва экологиялул министрнал буржру чIумуйсса бартбигьлагьиману ивтунни РахIман ХIамидов. ДР-лул граждан обороналул, ляличIисса тагьардал ва тIабиаьтрал бала –апатIирттал зараллу бухлаган баврил министрну личIлай ур Нариман КазимахIаммадов. Камил Сяидовгу ливчIунни ДР- лул жагьилтурал иширттал министрну.
ДР-лул БакIчинал хIукмурдайн бувну баххана бунни хIукуматрал цаймигу къуллугъчитал. ДР-лул промышленностьрал ва машлул министрну ивтунни Низам Халилов, ДР-лул экономикалул ва территориярттал лябуккулул министрну – Руслан Аьлиев, ДР-лул шяраваллил хозяйствалул ва бакIлахъиялул министрну – Баттал Батталов, ДР-лул энергетикалул ва ЖКХ-лул министрну – Манвел Мажонц, ДР-лул информациялул ва печатьрал министрну – Умарусман ХIажиев. Республикалул цIуллушиву дуруччаврил министрнал буржру чIумуйсса бартбигьлагьимурну бур Татьяна Беляева.
ХIукуматрал цаппара члентал бивтунни цивппа зий бивкIсса къуллугъирттай: ДР-лул строительствалул министрну ивтунни Малик Багълиев, ДР-лул культуралул министрнал буржру чIумуйну бартбигьлагьимурну – Зарема Буттаева, ДР-лул транспортрал ва ххуллул хозяйствалул министрнал буржру чIумуйну бартбигьлагьиману – Ширухан ХIажимурадов, ДР-лул миллатирттал политикалул ва диннал иширттал министрнал буржру чIумуйну бартбигьлагьиману – Энрик Муслимов, ДР-лул туризмалул ва халкьуннал касмурдал министрну – Расул Ибрагьимов.
МахIаммад МахIаммадов личIлай ур ДР-лул физкультуралул ва спортрал министрну, Изумруд МухIуттинова – ДР-лул захIматрал ва социал иширттал министрнал буржру чIумуйну бартбигьлагьимурну, Юнус Сяъдуев – Дагъусттаннал финансирттал министрнал буржру чIумуйну бартбигьлагьиману, КазиахIмад Сефикьурбанов – ДР-лул юстициялул министрнал буржру чIумуйну бартбигьлагьиману, Уммупазил Оьмарова – ДР-лул дуккаврил ва элмулул министрнал буржру чIумуйну бартбигьлагьимурну. ЦIуну сакин дуллалисса ДР-лул цифралул лябуккулул министрну ивтунни ур Сергей Снегирев.
Дахханашивуртту хьунни ДР-лул БакIчинал ва ХIукуматрал администрациялувугу. Му идаралул каялувчинал цалчинма хъиривчуну ивтунни Мурад Казиев. ДР-лул ХIукуматрал Капитал строительствалул управлениялул хъунаману ивтунни МахIаммад Аьзизов. Экономикалул ва территориярттал лябуккулул министрну зий ивкIсса ХIажи Султанов хьунни ДР-лул ХIукуматрал ЦIуссалакрал райондалийсса лак цIусса миналийн бизан баврил управлениялул хъунама.
ДР-лул Культуралул ирс ябаврил агентствалул каялувчину ивтунни МахIач Мусаев. ДР-лул ПаччахIлугърал тIювалул инспекциялул каялувчинал буржру чIумуйну бартбигьлагьиману ивтунни Сергей Касьянов.ТIагьир Кьагьриманов хьунни ДР-лул Машинарттал ва цамургу журалул техникалул ялув бацIаврил паччахIлугърал инспекциялул хъунаману. Дагъусттаннал Ветеринариялул комитетрал председательну ивтунни МахIаммад Шяпиев. Республикалул Госзакупкарттал комитетрал председательну – Жяъпар ХIажибеков.
Жамалуттин ХIасанов ивтунни Аьрасатнал ПрезидентначIасса ДР-лул даимансса Вакилну.
ДР-лул ПаччахIлугърал финансирттал контрольданул къуллугърал бакIчину ивтунни МахIач Ибрагьимов, ДР-лул тарифирттал къуллугърал каялувчину – Камил АьлигъалбарцIов, ДР-лул ВацIлул хозяйствалул комитетрал председательнал къуллугърай цIакь увунни Вагьаб АьбдулхIамидов.
