Чагъарданий загьир бувсса ца лахIзалул, ца суратралгу кувни кьиссардал бусаймур бусай. Ва суратрал кунма. Ва машгьурсса чичу Нажават (Жанна) Абуевал ичIувасса архивравасса сурат дур. Ва сурат ванил Фейсбукрай «Лакку билаят» тIисса группалуву дирхьунни, ва цичIара шарда душивугу кIицI лавгун. Суратрал махъ дур укунсса чичру : « Бюхттулсса Гъази-Гъумучатусса, ттунмагу ххирасса лакран, шама халкьуннал игитная, эстрадалул ва кинорал артистная, ччаврищал ва бусурманчунал дакI тIайлашиврущал. Ябаннав зу Аллагьнал! Лаккуятусса зул Гъази Дадаев! 27. 01. 1981 шин».
Сурат пишкаш дуллалисса чичру дурману ур, дянив авцIусса Аьрасатнал ва Дагъусттаннал халкьуннал артист Феликс Дадаев. Ванаяту кIил-шамил чивчуну буссия жула «Илчилийгу». «Солдаты ХХ века» тIисса Минобороналул итабавкьусса энциклопедиялий (том 2, стр 326) бувсун бур ванал дургьуну ивкIшиву Сталиннул роль.
Ва ивкIун ур Сталиннул двойникнугу. Так му ашкара бувссар яла, КГБ-лул къадагъа хьхьара хьуну махъ, 1996-ку шинал. Увну ур Феликс 1923 шинал Гъумук. Ванал цала «Изба-Читальня» порталданухьхьун дуллусса интервьюраву (автор Ирина Царёва) бувсмунийн бувну, захIматрал оьрму байбивхьуну бур буттацIа къалайчинал ва заргалнал пиша лахьхьаврийну Гъумук. Вайннал кулпат МахIачкъалалив бизайхту, ва танийсса оьрчIал ансамбльданувун (С. Стальскийл цIанийсса ансамбль, яла махъ «Лезгинка» цIа дирзсса) кьамул увну ивкIун ур. Грозныйлив дуснащал МахIмуд Эсамбаевлущал къавтIаврил гьунар магьир буллайгу ивкIун ур. МицIкIиссурттай къищуну къавтIисса оьрчIай ябавцIуну бур 1939 шинал Ухссавнил Ккавкказуллал магьирлугърал олимпиадалий Украиннал балайлул ва къавтIаврил ансамбльданул хъуниминнан, увцуну ур цIанихсса коллективравун.
Дяъви байбишайхту, талангу, разведкалий занангу, партизаншиву дуллангу багьну бур. Аьрая зана хьуну ур хъазамрай орден-медаллащал ва авадансса аьралий биографиялущал. Гихунмаймур оьрму лавгун бур магьирлугъраву. Ванал гьунарду чIявур: къавтIала, актёр, пародист, конферансье.
Суратрай куях ур Анатолий Папанов ва урчIах ур Юрий Никулин. Вай къакIулсса, вайннал цIарду къабавсса къалякъинссар цучIав.
