«Дагъусттаннал шинал учитель – 2021»

Январьданул 18-нния 22-ннин ва февральданул 9-нния 13-ннин щала билаятрал даражалийсса «Аьрасатнал шинал учитель» тIисса конкурсрал лагрулий жулла республикалийгу дантIиссар «Дагъусттаннал шинал учитель — 2021» тIисса конкурсрал ятIап. Мунил сакиншинна дувантIиссар ДР-лул КIулшивуртту дулаврил ва элмулул министерствалул ва ДИРО-рал.


Конкурсрал мурад хъанахъиссар цала пиша ххуйну кIулсса, цанма кIулмур вайми уртакьтуращалгу кIибачIин бюхъайсса, творчествалул журалий дарс дишин бюхъайсса педагогтал ялун личин баву.

Жулла республикалий хьунтIисса конкурсрай гьуртту хьун аьрзри буллуну бур 42 школалул. Конкурс нантIиссар зонардайх школартту бавчIуну. Зунттал районнал школарттал учительтал батIинтIиссар Гергебиллал райондалийсса КIикIуниннал школалий, лагьми зунттал районнал учительтал – Къарабудахккантуллал райондалийсса Манасрал школалий, кьиблалийсса районнал учительтал – Къаяккантуллал райондалийсса ЦIуссавикриял школалий, ухссавнийсса районнал учительтал- Къизлардал райондалийсса ЯтIул октябрьскаллал школалий. Ва ятIапрай 1-ми ва 2-ми кIанттурду бувгьусса учительтал гьуртту хьунтIиссар республикалул даражалий хьунтIимур конкурсрай.