[dropcap]Я[/dropcap]нварьданул 26-нний «Журавли» тIисса Элмулул ва цIуллу-сагъшиврул комплексрай хьунни «Религиозно-культурная среда как фактор лечения и реабилитации больных коронавирусом» цIанилусса халкьуннал дянивсса элмулул ва практикалул конференция. Ва цурдагу хас дурну дия ва кьини комплексрал хIаятраву «Единство» тIисса, мизит – килиса — синагога цачIусса, Диндалул ва кIулшивуртту дулаврил центр тIитIлатIисса шадлугъран.
Конференциялул хъамаллуравух ия Москавлия увкIсса Аьрасатнал бусурман мажлисрал бакIчи Альбир Хазрат Крганов, ДР-лул Госсекретарь Хизри Абакаров, ДР-лул миллатирттал политикалул ва диндалул иширттал министр Энрик Муслимов, академик, аьлимчу Шамил Аьлиев, шаннагу диндалул вакилтал, республикалул жяматийсса ишккаккулт ва журналистътал. Бусравсса хъамаллуравух чансса бакъая жула лакгу, миннавух бия: ДР-лул Жяматийсса палаталул хъунаманал хъиривчу Ссапарбаг Аьбдуллаев, ДР-лул оьрму дузал баврил зузалтрал профсоюзрал сакиншиндарал хъунама АьбдурахIман Адамов, политикалул элмурдал доктор Марзижат Буттаева, «СаллатIтурал нинухъру» тIисса Аьрасатнал комитетрал региондалул отделениялул хъунмур Таисия МахIаммадова.
Комплексрал гендиректор, МГУ-лул профессор МахIаммад МахIаммадовлул, конференциялул даву дайдихьлай, хъамаллурахь аьла-ссаламгу бувну, укунсса центр тIитIин дакIнийн багьаврия цIунилгу тикрал буллай, кIицI бунни цума-цагу инсаннан, цалла цIуллу-сагъшиврух аякьа даву дакъасса, дакIнивусса ва бакIравусса пикрирду марцI баврихгу къулагъас дуван аьркиншиврия. Бувсунни ванал мукунма март зуруя тихунмай комплекс хIадур хъанай бушиву ковидрал къашавай бивкIсса ва му азарданущал талай бивкIсса хIакинтал кьамул бан.
Таисия МахIаммадова, Аьлибаг Аьлиев
[dropcap]Ш[/dropcap]иккува дакIнийн бутанну ларгсса шинал гъинттул «Журавли» комплексрай реабилитациялий бивкIшиву ковидрал азарданул лахIан бувсса азарахъул къашайшалт, миннавух – хIакинталгу.
Медициналуву дингу архIалну агьалинал цIуллу-сагъшиврун бувайсса кумаграя къулайшинна кIилий-шамлий ххисса душивриясса ихтилат бувна видеосвязьрайхчIин конференциялул гьурттучитуращал хьунаавкьусса Индиянавасса аьлимчу Рича Райлулгу.
Бувсуна ванал цала билаятрай ва азарданущал цукун талай буссарив ва диндалул му ишираву бугьлагьисса кIанттуя.
Махъру мукунма лавхъуна ДР-лул миллатирттал политикалул ва диндалул иширттал министр Энрик Муслимовлул, РАН-лул член-корреспондент Григорий Кармазановскийл ва цайминнал.
Конференциялия махъ шаннагу диндалул вакилтурал, циняв хъамалгу гьурттуну, цал синагогалул, хъирив мизитрал яла килисалул хьхьичI ятIул лисригу кьуркьуну, дуаьртту дуруна. Шанмагу Заннал къатлуву дузал дурну дия увхнан хIалусса, къашайшалал дакI тирх учин дансса къулайсса шартIру. Гивура дия увхнал ка-ччан шюшинсса гъилисса щин, инсан щяикIансса кIанттурду ва гъилишиву, дюхлулшиву дузал дансса техника.
«Единство» синагога-мизит-килисалул центр тIивтIуну махъ, цинявннал цачIусса суратругу рирщуну, ахттайнссагу дуркуну мукьах, байбивхьуна конференциялул элмулулмур бутIа. Шикку хьусса ихтилатругу хас бувну бия коронавирусрал азарданущал щалла дунияллийсса хIакинтал цукун талай буссарив ххал бигьаврин ва му азардануща ххассал хьуну махъ хIакинтурал маслихIат буллалисса реабилитациялия гьарта-гьарзану бусаврийн. Вайннуя хьун аьркинссар гихунмай ишла бан бучIисса пособияртту ва медициналул литературалуву ишла дансса макьалартту.
Ахттакьун бизулуву центр тIитIаврин хасъсса шадлугъ сакиншинначитурал ларкьуна ссавруннайн салютру итадакьаврийну.
