Нью-Йорклив яхъанахъисса лакку душнищалсса ихтилат

Щала дунияллийх машгьур хьусса ию, UFC-лул чемпион ХIабиб НурмахIаммадов октагондалучIан уккайни итабакьайсса «Дагъусттан» тIисса балай къабавсса инсан нажагьсса акъа акъахьунссар. Амма цинявннан къакIулхьунссар му балайлул автор ва му щаллу буваймур Сабина Саидова лакку душ бушиву, цуппагу Гьарун Саидовлул уссил Бадавинал арснал арснал душ. Мукуна ва ххуллухгу ХIабиб увккунни Сабинал балайлухун.
Сабина чIявучин кIулссар Сабина Корс тIисса сахIналул псевдонимралу. Ва ялапар хъанай бур США-наву. Ванищалсса ттул дахIавугу, гьарта-гьарзасса ихтилатгу хьунни соцсетирдайхчин.

---

— Сабинай, буси цал, ва махъсса ХIабиблул ияврих буруглай буссияв? Вила балайлухун му нанийни, цукунсса асарду хIасул шай виву?
— Бурувгссиявкьай, къабурувгун шайссарив. Щала кулпат лагма лавгун, шаппа Бруклиннай бурувгру ХIабиблул бойрах. Цал уттигу ккаккан бунни ХIабиблул цува язима ушиву. ХIабиблул ххувшавурттая муданмагу ххарину бикIара, мунал ялув мудангу дакI цIий дикIай. Ттулва балайлухун му увккун нанийни тIурча, гьалаксса асардал дакI видурцIуну дикIай.

— ХIабиблущал цащалва кIул хьуссарав, оьрмулуву хьунабавкьуссарав?
— ХIабиблул дандиуккаву хьхьичIра-хьхьичI на ххал дурссар 2016-ку шинал Нью-Йорклив, амма му чIумал спортсментал ринграйн бувккун нанисса куц ккаккан къабувна, мунияту ттун къакIулссия му ттулва балайлухун увкшиву, му махъ кIул хьуна.

На ХIабиблучIан барча аврил махъру чивчуссия, хъун дакъа­сса видеороликгу дурссия, му «Фейсбукравусса» цалла лажиндарай дирхьуна мунал. Мукун ХIабибгу, нагу кIулну буссияв, лажин лажиндарайну кIул къахьурчагу. Гъанну кIул хьуссару жу 2018-ку шинал апрельданий – ХIабиблул ирглийсса ххувшаву ларсъсса чIумал, му ххуллухсса иявугу най дия жул къатрачIату 20 минутIрал ххуллийсса манзилданий ва миккун къалавгун бацIан жуща хъанай бакъая. Ияву къуртал хьуну махъ ттул ласнал ХIабиблущал цачIусса цала дустурайхчIин жун хьунабакьавугу сакин дуруна.
На пахрулий ва ххарину бура ХIабиблул ххувшавурттая, ва хъинну тIааьнну бур цалла хьхьичIуннайшивурттахунсса балайну мунал ттулва балай язи бугьаву.

— «Дагъусттан» балайлул тарихрая кIул хьуну ччива, му най бунава ХIабиблун куну чивчуссияв?
— Ва хар-хавар бакъа чивчусса балайри, ванияр ацIнияхъайсса шиннардил хьхьичI. Балай ля­хъан буллалийни, ттун пикривагу ча хьунссия UFC-лул чемпион ХIабиб НурмахIаммадов ванихун уккаванссар тIисса. Москав, 2008 шин, на бура РУДН-лул 1-мур курсирал студентка. Ца кьини ттуйн актовый залданувун оьвкуна Дагъусттаннал вакилханалул президентнал. Му ппурттуву 1-мур курсирал студентътурайн чIявуну оьвчайва, укун бикIияра, тукун янна лаххияра тIий, насихIатру буллай. Му чIумалгу мукунма оьвкусса ххива, къачча-къаччайна бувкIра. «Ина балай учайну­ккархха, хьунссарив концертрай Дагъусттаннахасса балай учин?» — куну цIувххунни.

Хьунссар учав, амма миккува бувчIлай бия Дагъусттаннаха­сса уттининсса балайрдава цавагу ттунма къабакьинтIишиву, ва пик­ри хьуна цIусса балай чичин. Рояльданух щябивкIун, макьан ляхъан дуллан бикIайхту, му цийнура цурда дарчуна, ссихIир бувсса кунна. Ттун баян бунни концерт ца-кIива гьантлувун дикIантIишиву ва гьунттиймур кьини хьунтIисса генерал репетициялий щаллу буванну балай хIадурну бикIан аьркиншиву. Мура хьхьуну, махъатунин щябивкIун, му макьандалухун­сса махъругу чивчуссия.

Ялагу, джинсы дакъа къалаххайсса ттун баян бунни репетициялийн юбкалуву бучIан аьркиншиву, хъинни, бучIанна учирчагу, навамур ттухьва нава бура утти му юбкагу ча буккави тIий. Ларсун ниттичIату яннагу, бувкIра хъиривмур кьини репетициялийн. Щаллу бував балай, цинявннан дакI даркьунни, цIарду дунни, амма концертрал режиссернал баян бунни гьарца миллатрая, региондалия ца-ца номер бушиву ва Да­гъусттаннал чулуха концертрай гьуртту хьун къавтIаврил коллектив ккаккан бувну бушиву. Ттул лагма-ялттуми къума лавгунни, цукунни, циванни, ваксса ххуйсса балай тIий. Къаучирча, къаучинссар куну, навамур паракьат хьура. Концертрал кьини университетравун бувкIра, вайми кьинирдай кунма, джинсылул хIажакраву, концертрайн бачин­сса пикривагу бакъа. Дарсирдая махъ университетрава шаппайн бувккун нанисса ттучIан левчунма бувкIунни концертрал сакиншиндаралсса буллалисса душру: «Жу икьрал дуварду концертрай ина балай учинтIишиврий», — тIий. «Цукунни, цири, концерт дайдишин ссят лирчIун дур, нарив балайлул махърувагу къалахьхьав», — тIисса на. Университетрал столовойлувун лавгун, чичав чагъарданий махъру, балай тIийни нигьабусаврил хъамакъабитаншиврул. Балай учингу сахIналийн буккан багьссар президентнан ккарккун къаччай диркIсса джинсылуву. Балай чIявучин ххуй бивзуна, концертрая махъ ттучIан гъан хъанан бивкIуна: «Чичакьай мукунма­сса балай Къазахъисттаннаха­ссагу, Арманинахассагу», — тIий. Амма шайссарив къаватандалия дакIнийхтунусса балай ляхъан буван!? Вана укунсса хьуссар ва балайлул ух-тарих.

— Ина шоу-бизнесраву «Сабина Корс» тIий кIулну бура. Вил псевдонимрал цичIав мяъна дуссаривкьай ягу?
— Дакъассар цукунчIавсса мяъна. На Сабина Саидова тIий сахIналийн буклакисса чIумал, Дагъусттаннаясса цайми балайчитуращал дяйркьин дуллай бикIайва ттул цIа, хIатта Цалчинмур каналданий ккаккан дурсса ХIабиблущалсса передачалийгума «Дагъусттан» тIисса ттул балайлул авторну кIицI лавгуна Сабина Аьлиева, муниннин передачалул редакторнал ттучIан оьвкуну, цIа-бакI цIувххуну диркIнугу, гъалатI итабавкьуну бия. Интернетравугу ттун ттулва балайрду цайми цIардалу ххал шайва. Мунияту пикри бувссия Сабина Корс (Sabine Kors) тIисса цIанилу бук­лан.
— Вил мина-гьану дур цIа дурксса Гьарун Саидовлул тухумдалия нанисса. Буси вилва мархрая, кулпатрая.

— Ттул буттал чулухамур тухум бур Саидовхъаясса, ниттил чулухамур – МахIачевхъаясса, кIивайвагу Ваччатуссар. Ттул буттал ппу Аьвдуллагь Саидов хъанахъиссар Бадави Саидовлул арс ва Гьарун Саидовлул ­уссил арс. Аьвдуллагьлул каялувшиндаралу Дагъусттаннай хъинну чIявусса ламурду був­ссар. ХIайп, му на дунияллийн бу­кканнина дунияллия лавгун ия. Цалва оьрмулул махъсса шинну мунал цалва кулпатращал Бакуй дирчуну дия, миккун му тIайла увккун ия даврил ялув.

Ниттил ппу ХIажимуси Ма­хIа­­чев хъуна хьуну ур детдомрай, мунал ппу Хъун дяъвилий СталинградрачIа ятIа-тIар бакъа акъа хьуну ия, нинугу дяъви дахьва байбивхьу­сса ппурттуву оьрчIах диркIуну дия. ХIажимуси зий икIайссия Сепаратордал заводрай, ни­ттил нину Залихха тIурча, 26-мур школалий медсестрану зий дикIайссия, яларив, педагогналмур кIулшивугу ларсун, чIу къабаяйсса, гъалгъа тIун къашайсса оьрчIащал зий дикIайва.

Ттул ниттил Аьйшатлул къуртал бувссар МахIачкъалаллал музыкалул училище. Ттул буттан Саидлун щар хьуну, кулпат бувну, Бакуйн бивзссар. Нину шарда оьрчIалсса буллай, ппу Связьрал институтраву зий бивкIссар. Карабахлив дяъви байбивхьуну махъ нину-ппу, нагу, ттул уссу Аьвдуллагьгу бувцуну, бивзссар Москавлив. Цуксса кьурчIинугу, ппу оьрмулува ччяни лавгунни. Ниттищарив бювхъунни билаят­рал хъуншагьрулий жу дуккин бан, гьарца аьркинмунил щаллу буван. Ттул уссу Аьвдуллагь Саидов скрипачри, мунал къуртал бувссар Москавуллал консерватория. Концертращал Дагъус­ттаннайнгу лавгссия.

Буттал шяравун Ваччав на оьрчIний цаппаралилва бив­ссара, кIаницIун дархIусса дакI­нийн бичавуртту дур тIааьнсса. Ччива цIунилгу буттал шяравун биян, вайксса шинну ларгун махъ цайми ярунних буруган цимурцаннух. На чIивину бунава багьну бура Москавлив, школагу, институтгу Москавлив бувккуссар. Цуксса хIайпнугу, ниттил маз ххуйну къакIулли, цаппарасса махъру, калимар­тту дурчIирча дакъа. Гьарца гъинттул МахIачкъалалив каникуллай бувкIсса чIумал, аму-дада хIарачатрай дикIайва ттун лакку маз лахьхьин буван. МахIачкъалалуцIун дархIуну дуссар ттул оьрчIшиврул ва жагьилшиврул яла яргми дакI­нийн бичавурттугу. Хьхьири ва зунттурду, караматсса тIа­биаьтгу, чIявусса гъанчугу кьабивтун, гъинтнил ахирданий, къачча-къаччайнма, бачин багьайва магъмунсса, баргъ чан­сса Москавлив.

Ялагу щаллу­сса шинал лахъишиврий ялугьлай бикIайссияв Дагъусттаннайн бачинсса мутталух. «Да­гъусттан» балайлучIан зана хъанай, учин, вана вай циняв асарду бювхъуна ттуща му балайлуву цачIун буван. Миву щялусса, хъунма бувсса, ягу ттунма асар къавхьусса цавагу махъ бакъассар. Мисалдаран, «Когда утро еще не разбудит свет» тIисса махъру на бахIав ттула амуцIун (ниттил ниттицIун), му ччяни дизайва, мунил хъирив – нагу. КIюрххил ссят 5-6 хьуну хIаятраву чяй хIачIлай щябивкIун бикIайссияв, лагмарагу – паракьатшиву, нахIушиву, марцIсса гьава.
Ттул лас ур даргиричу, увну ва хъуна хьуну ур МахIачкъалалив, оьрмулул 23 шинаву ивзун ур Нью-Йорклив ва муния шинай ялапар хъанай ур США-наву. Ва ур программист ва веб-дизайнер. Уттигъанну жун увунни арс, ванан Алан тIисса цIа дизарду.

— Москавлия Нью-Йорк­райн бизайхту захIматну бакъаяв чил билаятрай?
— Ттун Нью-Йорк муданмагу ххуй бизайва. ЗахIматнугу ба­къая, цанчирча ттун оьрчIнияцIава ингилис маз кIулну бикIайва. Ва ялагу, захIматну бикIайхьунссар, чIарав гъансса инсан акъани. Ттущаллив шийх лас ур, ванал нину-ппу бур. Бизар хъанансса чIуннугу къадикIай, цанчирча лас ва нава буру давриву дакIру дирхьусса инсантал, уттирив – оьрчIахами, дунияллий гай яла тIааьнми къайгъурдугу ххи хьунни. Ялагу, шийхгу къачан­сса да­гъусттанлувтал, миннавухгу жул дусталгу, бур, жу чIявуну миннащал хьунабакьару, Аьрасатнаву­сса, Дагъусттаннай­сса дустуращалгу мудан дахIаврий би­кIару.

Му бакъассагу, агарда на, Нью-Йоркрай бакъа, США-нал цамур кIанттай, учиннуча, Техасрай, ялапар хъанай бивкIссания, на бизаршиврул бивчIанссияв. Америка – цIа ца дур, амма му шиккугу, цамур кIанайгу личIи-личIисса бур. Нью-Йорк бур дунияллул хъуншагьру, шикку дур инсан аьдат хьусса, мунан аьркинсса цимурца, шикку вин бигьанма хъамабитантIиссар инава Американаву ялапар хъанай ушиву. Шикку хIала дурххун дур цимирагу культура, оьрмулул кьарал ва дунияллухсса бургаву. Оьрус мазрайсса ихтилат къабавсса кьини къашай – ттучаннай, кинотеатрдаву, паркирдаву. Ивзун, тинай хьуну, шийх бюхълай бур ччарча узбакIнал пулав букан, ччарча – манты, ягу лавгун ттучандалийн, Аьрасатнаву дикIайсса винна ччимур ласун.
— Барчаллагь, Сабинай. Умуд бур вания гихунмайгу жулва ихтилат байкъалитIуншиврийн -Дагъусттанная, спортрая, музыкалия, Американая. ТIайлабацIу баннав вин вания тинмайгу гьарца ишираву.

Ихтилат бувссар
Бадрижамал Аьлиевал