Ларгсса нюжмардий МахIачкъалалив, Дагъусттаннал Художниктурал союзрал Выставкартту дувай залдануву, хьунни Республикалул декоратив-прикладной ва изобразительный искусствалул «Дагъусттаннал щаращив» цIанилусса выставка.

«Самородки» проектрал лагрулийсса ирглийсса ккаккия

Му сакин дурну дия ДР-лул Культуралул министерствалул ва Республикалул Халкьуннал творчествалул къатлул, Дагъусттан Республикалул Художниктурал союзрал кабакьаврийну, Республикалул «Самородки» тIисса проектрал лагрулий, ДАССР сакин дурну 100 шинал таварихран хасну.
Выставка тIитIлай, ихтилат бувна ДР-лул культуралул министрнал хъиривчу – Халкьуннал творчествалул къатлул директор Марита МухIадовал.
– ХIакьину ккаккиялун дирхьусса затру Дагъусттаннал визитный карточкарттуну хъана­хъиссар. Вайннул кумаграйну республикалул хъамаллувран кIул хъанахъиссар жула халкьуннал аьдатирттая, культуралия, багьу-бизулия. Жулва усттартурал магьирсса каруннийн бувну, жущара бюхълай бур ядуван ва цIакь дуллан дунияллулмур культуралущалсса дахIаву, му культуралувун жулламур ляличIишивугу ларсун най. ХIакьину выставкалий гьуртту хъанай ур республикалул 21 муниципалитетраясса 48 усттар. Умуд бур жулла кьюкьраву махъа нанисса жагьилталгу ххи хьунссар тIисса ва никирая никирайнсса ламурдугу абадлий яхьунссар тIисса, – увкуна Марита Велихановнал.
Выставка тIитIлатIисса шадлугърай мукунма гьуртту хьуна ДР-лул Художниктурал союзрал председатель Кьурбанаьли МахIаммадов, ДР-лул Художниктурал союзрал Выставкартту дувай залданул директор Амирхан МахIаммадов, искусствоведтал Мариян МахIаммадова-Чалабова ва Татьяна Петенина, республикалул муниципалитетирттайсса Аслийсса культуралул центрдал каялувчитал ва чIявусса цаймигу хъамал.
Выставкалий дирхьуну дия МахIачкъала, Буйнакск, Каспийск, Избербаш, Къизлар шагьрурдаясса, Агъуллал, Ахъушиял, Бущихъиял, Буйнакскаллал, Дахадаевуллал, Къайтагъуллал, Къаяккантуллал, Къизлардал, Ккуллал, Сулайман-Стальскаллал, Табасараннал, Тарумовкаллал, УнцIукIуллал, Хасавюртуллал, Хивуллал районнаясса ва БежтIиял участокраясса усттартурал каруннил дурсса 200-нния лирчусса даву: бартбисуртту, мусил ва сунттул ххаллай щаршсса лачакру, кьютIру бавзуну дурсса виргъанну, усру, жуларду, бархъаллал, сулавккантуллал ва испикуллал тIахIунтту, ярагъ, хъаннил чIюлушиннарду (кIисри-канишру) ва м.ц..
Ккаккиялун дирхьуну дия Ккуллал райондалиясса 2-мур ЦIувкIуллал шяравасса Зина Гудовал ппалул ххаллая щаршсса затругу (жуларду, лачакру, чантайртту).
Выставкалий гьуртту хъанай бия Дахадаевуллал райондалий­сса Харбук шяравасса Жавгьар МахIаммадкьадиевагу – Дагъус­ттаннай бувагу бусса ца хъамитайпа – муххал усттар. Мунил бувсса ярагъирахгу дия тамашачитурал ляличIиссара къулагъас.
Мукунна чIявучил итталун дагьлай дия жулва лакку душ Башикар Гадаевал каялувшиндаралусса Каспийскаллал Аслий­сса культуралул центрданул экспозициягу. Микку дия щаллуну аццая дурсса хъинну авур­сса ссихьри, жулва халкьуннал аслийсса янна-уссавусса, каруннихь урша-варакъигу бувгьу­сса. Ссихьри, миннухьсса урша-варакъи буван усттартурал ишла дурну дия ичIурасса му-та: аьт­рилул шушлуя, чIутIлуя байбивхьуну, кюрщантрайн, карнизрал бутIлуйн дияннинсса затру, ялун бурувгун най дуна дурчIлайгума дакъая ми цирив, ссая дурссарив.
Январьданул 30-ннин лахъи лагантIисса выставка ккаккан бюхъантIиссар ва адресрай:
ш. МахIачкъала, Р. ХIам­затовлул проспект, 113 а, ДР-лул Художниктурал союзрал Выставкартту дувай зал.
Выставка зузиссар ссят 10:00 хьуну 17:00 хьуннин гьарца кьини, алхIаткьини личIаннин.