Декабрь зурул 27-нний кIицI лагайсса Ххассалбувултрал пишалул кьинилуцIун бавхIуну, гьар мудан кунма, гьашинугу Дагъусттаннал МЧС- рал Агьаммур управлениялий хьунни наградартту дуллалисса шадлугърал мажлис. Лайкь хьуминнан дуллай бия «Горячее сердце» цIанилусса щалагу Аьрасатнал жяматийсса сипталул чулухасса, мукунна МЧС-рал ва Аьрасатнал Федерациялул Советрал чулухасса наградартту.
ДакIнийн бутан, Социал ва культуралул сиптардал фондрал дуллалиссар «Горячее сердце» акция 2013-ку шинал ноябрь зуруя байбивхьуну. Ванил агьаммур мурадгу хъанахъиссар захIматсса тагьарданувун багьсса инсантал ххассал бувсса 23 шинавун бияннинсса оьрчIру лахъа- хъун баву. Ряхра шинал мутталий вайннал чулухасса наградартту лайкь дурну дур 835 инсаннал.
Ва кьинисса шадлугърал мажлисрай гьуртту хьунни Дагъусттаннал ХIукуматрал Председательнал хъиривчунал бигарду чIумуйсса щаллу буллалисса Рамазан ЖахIпаров, Дагъусттаннал МЧС-рал Агьаммур управлениялул хъунама Нариман КазимахIаммадов ва м.ц.
– ХIакьину жува лахъа- хъун буллай буру нигь- ццах дакъасса, цала къучагъшиву ккаккан дурсса оьрчIру. ЧIярумур чIумал захIматсса тагьарданувун багьсса инсантал ххассал буллан багьайссар цала оьрмулун ва цIуллу-сагъшиврун нигьачIаву дусса шартIирдай. Мукун бунугу, хIакьинусса жула вирттавраву, оьрчIру бакъасса, душругума бур.
Вай цинявппагу лайкьссар махъсса жагьи-жугьулнал эбрат ласун, – увкунни Нариман КазимахIаммадовлул мероприятие тIитIлай. Ванал мукунма бувсунни гьашину цала къуллугъран 30 шин там хъанахъишиву ва вайксса шиннардил лажиндарай цащара чIярусса ккалли дансса давуртту дан бювхъушиву. Хъирив дуллунни наградартту. Хъазамраву лачIайсса лишан, диплом ва «Горячее сердце» тIисса лу буллунни республикалул личIи- личIисса школардаясса дуклаки оьрчIан: МахIаммад ХIамзатовлун, Уммукусум Тажибован, Динислам Аьлиевлун, Аминат АьвдурахIманован, Ризван Кубумаевлун, МахIаммад Султанбаговлун.
Хъирив оьрчIру барча буллалисса ихтилат бунни Рамазан ЖахIпаровлул. Ванал барчаллагь увкунни укунсса оьрчIру тарбия бувсса нитти-буттахь.
Нариман КазимахIаммадовлул дуллунни «Бюкьлакьими ххассал баврихлу» тIисса Аьрасатнал МЧС-рал медаллу «Дагестан Энерго» ООО-лул хъунаманал хъиривчу Гарибан Оьмаркьадиевлун, Дагъусттаннал УФСИН-далул (ЛИУ-4) зузала Сайгид Айдамировлун, дуклаки оьрчIру Динислам Аьлиевлун, Самира Алдербекован, Муслим Далгатовлун, Мурад Мутаевлун, Уммукусум Тажибован ва МахIаммад ХIамзатовлун.
Уммукусум Тажибован ва МахIаммад ХIамзатовлун мукунма Федерациялул Советрал чулуха баян бунни барчаллагь.
