Лакрал ва Ккуллал районнал аьрали комиссариатрал кIирагу райондалул школарттай дуллай бур акция «Есть такая профессия – Родину защищать» тIисса.
Акция сакин бувну бур Аьрасатнал мюхчаншиву дуруччаврил министерствалул сипталий, школартту ва кадетътурал школартту къуртал буллалиминнайн билаятрал Аьрали дуккаврил идарарттавун дуклан оьвчаву дуллай. Аьрали комиссариатрал зузалт, школарттайх занай, школа къуртал буллалиминнахь ва миннал нитти-буттахь буслай бур билаятрал аьрали дуккаврил идарарттая, миккусса дуккаврил шартIирдая, дуклан бувхминнансса хIаллихшиннардая.
Лакрал ва Ккуллал районнал аьрали комиссар ХIасан Массуевлул бусаврийн бувну, хIакьинусса кьининийн Аьрасатнаву бусса бур 40 лавайсса ва дянивсса Аьрали дуккаврил идара. Миккун дуклан бувхсса оьрчIан дусса дур чувчIав цайми дуккаврил идарарттай дакъасса куклушиннарду. Ватан дуруччултрал пиша язи бувгьуми паччахIлугърал щаллуну цала аякьалулун ласлай бусса бур. Дузал дуллай бусса бур миннал оьрмулул гьарцагу шартIру: яхьунсса кIану, янна-ка, дукия, харж ва социальный пакет (мивун багьлай бур медициналул хIаллихшиннарду, курортирттай уква бигьалагансса щаллушин ва цаймигу къулайсса шартIру).
Дуккаву къуртал дайхту, чIивима лейтенантнал чингу дуллуну, ххуйсса харжгу бивхьуну, ми дузал буллай бур давурттал. Кулпатру буминнан буллай бур чIумуйну яхьунсса къатри. Контрактрай ххюра шин дайхту, паччахIлугърал буллай бур цува заллусса къатта.
ХIасил, Ватан дуручлачими паччахIлугърангу хьхьичIунну бушиву бусласисса акция бур.
