Дагъусттаннал хъунаманал бурж чIумуйну бартбигьлагьи­сса Сергей Меликовлул, «тарихийсса аьпа ябаву мурадрай ва жагьилсса ник патриот зумуну тарбия дуваву мурадрай», 2021 шин баян бунни ДАССР хIасул хьуну 100 шин хъанахъи шинну. Жунма кIулну бикIан аьркинссар мукъуйну ва иширайну жулла республикалий совет паччахIлугъ цIакь дурми. Жулва буржри ми дакIнийн бутан.

Дагъусттаннал тарихраву ца мукунсса паччахIлугърал ишккаккур Ибрагьимлул арс ХIавинахъал Саэд. Биялсса захIматгу бивхьуссар, хIарачат бувссар ванал Дагъусттаннал совет автономия хIасул дувавриву. Дагъусттаннал паччахIлугъ цIакь дуваврил пикри-хиял «зунттал билаятрал» агьалинал оьрму ххуй буван чялиш увккун ивкIсса большевик-революционернал щалвагу оьр­мулул ттарцIну хьу­ссар. Революционер хIисаврайсса ванал ххуллу байбивхьуссар архсса 1905 шинал. Ва шинал январь зурул 9-нний гьуртту хьуссар Петербургливсса зузалтрал митинграй, путиловцынащал (ва Петербургливсса оьрус инженер ва предприниматель Путиловлул цIанийсса хъунзаводри, таний 12 азара зузала зий ивкIсса) архIал кучардайсса баррикадарттай талай ивкIссар.

[dropcap]Ч[/dropcap]Iал къавхьуну ХIавинахъал Саэд ивзссар Владикавказ шагьрулийн, тиккугу октябрь зуруй хьусса монархистуращалсса черносотенцынащалсса ярагъуннил балгусса талатавурттаву хьхьичIунну гьуртту хьуссар. 1906 шинал Саэд Дагъусттаннайн зана хьуссар ва най унува хIала увхссар революциялул ишир­ттавух. Аькьлу куртIсса, гьунар ххисса, ххуйсса оьрму дузал буван чялиш увксса ХIавинахъал Саэд Петербурглив университетраву дуклай унива, тиккува, Петербургливгу, Москавливгу, Къиримнавугу, Ростоврайгу, Бакуйгу, Нальчикрайгу, Щурагьгу ва билаятрал цаймигу шагьрурдай лекцияртту ккалай ивкIссар. 1908 шинал, оьрмулун нигьачIингу дунура, Саэд Владикавказ, Баку ва Грозный шагьрурдайн кьюлтIсса литература диян дуллай ивкIссар. 1912-1914 шиннардий мукунма кьюлтIну Петербурглив «Дагъусттаннал ххяххабаргъ» ва «Бусурманнал кказит» тIисса кказитру итабакьлай ивкIссар. Вай кказитирттал тани агьали паччахIнал самодержавиялийн къаршину гьаз хьун чантI учин буллай бивкIссар, му талатаву чара бакъа ягин дуван аьркиншиврий мукIру буллай бивкIссар. «Дагъусттаннал ххяххабаргъ» – му хасну редакторнал чувшиву диркIссар, буккултрал ва кказит ппив буллалиминнал чувшиву диркIссар. Кказит паччахIнал властирдал ва спецслужбардал къизгъинсса цIаравух буклай бивкIссар, кказит итабакьайми ццах къакIулну къуццу тIий бивкIссар, мудан цала хъирив багьну бушиву бувчIлай ва чIалай бунува, аьрзакартурал азурда буллай бунува. Шиккува кIицI лаган, ХIавинахъал Саэд цIусса культуралул ва революциялул ххуллу-ххуттайсса Дагъусттаннал цалчинми литератортуравасса, публицистуравасса, журналистътурава­ссар. Та чIумал тукунсса кказит итабакьлан хъуннасса чувшивугу, бюхъу-тяхъагу, тавпикьгу, гъирагу, кьудратгу аьркинну диркIссар. Вай циняв хасиятру диркIссар Саэдлуву. Ванал гьалмахтурал бувсмунийн бувну, Саэд зурдардий, хьхьу-кьини усттулдануха къаизлай, зий, чичлай ивкIссар. ЧIявуми политикалул статьярдугу цала чичайсса бивкIссар, цал архIал цува редакторнугу, корректорнугу, наборщикнугу зий ивкIссар. Ванал публицистика Ккавкказнаву ва лагма-ялттусса кIанттурдайсса паччахIнал политикалийн къаршисса диркIссар. Ва гьаз буллай ивкIссар хъаннил ихтиярду ссуссукьу дуллан къабучIишиврул, миннун дуклан аьркиншиврул масъалартту. Ванал макьаларттаватур революциялул демократътурал, – Герценнул, Чернышевскийл, Добролюбовлул, идеярттая зунттал агьалинан хавар хьуссагу, мукунма оьрус литературалул классиктурал, – Лермонтовлул, Некрасовлул, Горькийл, Хетагуровлул ва цайминнал, произведениярттая кIул хьуссагу. 1917 шинал февраль революция дайдишайхту, ХIавинахъал Саэд цIуницIа зана хьуссар Дагъусттаннайн, цIуницIа чялишну хIала увхссар революциялул иширттавух.
ЧIал къавхьуну ва ивтссар Гъази-Гъумучиял округрал комиссарну. 1918 шинал май зуруй Уллубий Буйнакскийщал, МахIач Дахадаевлущал ва Жалалуттин Къурхъмасовлущал увхссар Дагъусттаннал областьрал аьрали-революциялул комитетравун, муницIухва увчIуссар зузалтрал, хъудугьултрал ва солдатътурал депутатътурал Да­гъусттаннал областьрал советрал исполкомрал Председательнугу, аьрали-революциялул трибуналданул Председательнугу. Му бакъассагу, финансирттал комиссарнугу ивтссар. 1918 шинал ноябрь зурул 28-нний Владикавказрай хьусса Терскаллал областьрал захIматрал халкьуннал съездрай мунал дащуй дирхьуссар Горское правительство, чIурчIав дурссар Ухссавнил Ккавкказуллал республикарттал автономиялул статус цIакь давриву агьамиву душиву. Мунийннингу, 1918 шинал , гъинттул ва ссуттил, кIялагвардиялул генерал Деникиннущалсса партизантурал талатаву гужлан даву мурадрайсса Горская секция хIасул бувну бивкIссар, даврил ялув бацIаву дуллансса. Му секциялувун бувтун бивкIссар Ух­ссавнил Ккавкказуллал вакилтал, секциялул даврил каялувчинугу ивкIссар ХIавинахъал Саэд. 1919 шинал Серго Орджоникидзещал архIал, къизгъинсса талатавуртту хьуну, Владикавказрай чIумуйнусса душмантурая лякIин багьссар. Вава Орджоникидзещал архIал Ингушетиянаву кIучI хьун багьссар. 1919 шинал май зуруй Габиевлул кьюкьлуща, кIялагвардиялул вив лавсъсса кIанттурдайх хьуну, Дагъусттаннайн буккан бювхъуссар. Ванал кьимат лахъну бивкIссар ОрджоникидзечIа ва КировлучIа, цаймигу цIанихсса революционертурачIа.
1920-1921 шиннардий, Да­гъусттаннан яла захIматми чIуннардий, ХIавинахъад Саэд ивтссар Дагъусттаннал Ревкомрал председательну. 1920 шинал август зуруй, аьмсса Аьрасатнал Оргбюроравун увчIайхтугу, Бакуй Магърибуллал агьалинал съезд хIадур дуллайгу хъунна­сса даву дурссар. Ва съездрал хIадуршинна Исполкомрал тапшур дурну диркIссар Орджоникидзен, Стасовлуйн, Наримановлуйн ва Габиевлуйн.
1920 шинал ноябрь зурул байбихьулий Саэд Габиевлул рес­публикалул урчIра округрайн тIайла дуркссар укунсса телеграммартту: «Ноябрь зурул 10-нний хьунтIиссар округир­ттал вакилтал бавтIсса областьрал съезд. Мунияту тапшур буллай ура, фронтрахгу къулагъас чан хьун къадиртун, дуван багьлагьимургу сантирай дуллай, чIалгу къавхьуну, ва съездрайн тIайла букканми бувчIинсса бувчIавуртту дуван».
Дагъусттаннал автономия цIакь дуваврил лагма биялсса аваза бусса ппур­ттувугу ми бувчIавуртту найнна диркIссар. Зунттаву дяъвигу бивкIссар. Габиевлунгу съездрал дата даххана дуллалисса телеграммартту цIуницIа гьан дуван багьссар. Дяъвилул чIумул захIматшивурттахгу къабурувгуну, 1920 шинал ноябрь зурул 12-нний Щурагь хьу­ссар Да­гъусттаннал халкьуннал Чярхнийсса съезд. Съездрайн бавтIссар Дагъусттаннал циняв округирттаятусса 300 делегат. Ва съездрай Дагъусттаннал автономия дуллалишиву баян був­ссар Иосиф Сталиннул. Ва цувагу Щурагь ливккун ивкIссар ХIавинахъал Саэдлул къатрай, мунал хъамаличуну. Съездрай ХIавинахъал Саэдлул ихтилат бувайхту, гурсса хъатру ришлай бивкIссар делегатътал. Габиевлул ихтилат бувссар зунттал региондалул лакрал агьалинал цIанияту.
– Бартлавгунни чIярусса шиннардил лахъишиврий хIат-хIисав дакъасса душмантурая Дагъусттан буручлай, оь экьибутIлай, кьянкьану бавцIуну бивкIсса вирттаврал хиял – Москавлия баян бунни автономия цIакь дурсса хавар. Утти жува жула кьадарданул заллухъруру, – укунсса мяъна-мурадрайсса ихтилат бувссар «революциялул зал» Саэд Габиевлул. Ванала маслихIат бувссар микку резолюциягу кьамул дуван. Та резолюциялий «Совет Аьрасатнал захIматкашнащалсса дусшиврул ва хIала-гьурттушиврул арарду цIакь дуваврия, цIу оьрму дузал баврил ххуллий уртакьну зузаврия» чивчуну бивкIссар. Бартлавгссар Саэд Габиевлулгу, та чIумалсса Дагъусттаннал бакIчитуралгу хиял – Дагъусттаанал автономия баян баву.
Централ органнащал ар­хIал автономиялул гьануми кIанттурду хьхьичIххуттайн ласунсса делегациягу бувчIуссар съездрай. Делегациялуву бивкI­ссар Саэд Габиев, Къорхъмасов, Тахо-Годи. Амма, ХIуцциннал Нажмуттиннул совет властьрайн къаршисса гъургъазар­тту сававну, Дагъусттаннайсса тагьар нигьачIисса дуну тIий, Саэд Габиевлухлу делегациялувун Даг­ревкомрал член М. Хизроев увчIин багьссар.
Яла махъгу Саэд Габиев жаваблувшинна ххисса къуллугъирттай зий ивкIссар: ДАССР-нул Совнаркомрал председательнал хъиривчуну, Просвещениялул цалчинма халкьуннал комиссарну, ДАССР-данул финансирттал наркомну. 1927 шиная тинай Гуржисттаннай Заккав­кказуллал СФСР-данул финансирттал халкьуннал комиссарнал хъиривчуну зий ивкIссар. Муния махъ тIурча– Заккав­кказуллал щинал хозяйствалул управлениялул хъунаману, вава Заккавкказуллал Совнаркомрал печатьрал иширттал управлениялул хъунаману.
ХIавинахъал Саэд, хъунасса революционер ва паччахIлугърал ишккакку акъагу, гьунар бусса аьлимчу-историк, публицист, шаэргу ивкIссар.
Серго Орджоникидзел, Саэд Габиевлун кьимат бишлай, куну бур укун: «Жул гьалмахтал, цаппара «коммунистътал» таш-виш хъанахъисса чIумал, щалвагу билаятран захIматсса ппурттуву, Габиев, жард къаувкуну, жущала ивкIссар, гьалмахчуну, дусну ивкIссар».
Саэд Габиев чувшиврул, къириятрал ва адаврал эбратну хьуссар, халкьуннаха дазу дакъа къуллугъ баврил эбратну ливчIссар тарихравугу. Да­гъусттаннал тания мукьах бивтсса ттуршра шинал лахъишиврийсса ххуллу-ххуттавугу биял­сса бутIа буссар тай шиннардий паччахIлугърал гьанурду бивзминнал. Миннавух арулххуттай дуссар ХIавинахъал Саэдлулмур цIагу.
ХIадис ХIадисов,
тарихрал учитель