Къатта пIякь учин бувсса кIанай – аллея

Къатта пIякь учин бувсса кIанай – аллея

Каспийск шагьрулий Лениннул кIичIираву, 1996-ку шинал ноябрьданул 16-нний дурсса терактраву ливтIуминнал аьпалун дацIан дурсса мемориалданучIа хьунни му кIанттай аллея баврин хас дурсса батIаву. Муний гьуртту хьунни ДР-лул миллатрал политикалул ва диндалул иширттал министр Энрик Муслимов, Каспийск шагьрулул бакIчи Борис Гонцов, мунал хъиривчу Руслан МахIмудов, шагьрулул мажлисрал депутатътурал корпусрал председатель АьбдулвахIид Жаватов, дазу дуруччайминнал къуллугърал, жяматийсса организациярттал вакилтал, дуклаки оьрчIру.


БатIаву тIитIлатIисса цалва ихтилатраву Энрик Муслимовлул кIицI лавгунни га оьсса хьхьуну ливтIуцирив так ца Каспийскаллал агьалинан бакъасса, щалвагу Дагъусттаннал агьалинан хъамакъабитантIишиву, къатта пIякь учин бувсса кIанай аллея бувансса пикригу – му ххуйсса пикри бушиву.

Руслан МахIмудовлул цалвамур ихтилатраву бувсуна дазу дуруччайми ялапар хъанахъисса чIяру зивурду дусса къатта пIякь учин бувсса кIанай аллея баврицIун дархIусса давуртту дуллалишиву « Мой Дагестан – комфортная городская среда» приоритет проектрал лагрулий.

Га теракт дурния шиннай гьарца шинах ва кIанай шай­ссар ливтIуми дакIнийн бичлачисса, минная аьпалул махъ тIисса батIавуртту ва минуй гьарца шинах гьурттушинна дувайссар га оьсса хьхьуну щаллусса кулпатрацIа – ласнацIа ва 3 арснацIа хьусса Елена Заловал. Ва ххуллухгу мукунма.
– Терактраву ивкIусса 69-гу инсаннал цIарду кусса мурхьру бувгьусса аллея хьунтIиссар жува бух буван къашайшиврул лишанну, — тIий бур Елена Залова.

Читайте также: