2004 шинал Москавлив «Атлант» луттирду итабакьай идаралул итабавкьуну бур тарихирттал элмурдал доктор Э. Г. Аствацатаряннул чивчусса «Ккавкказуллал халкьуннал ярагъ» («Оружие народов Кавказа») тIисса лу. Ванил автор зий бивкIссар ПаччахIлугърал Тарихийсса музейрал хьхьичIунсса элмийсса зузалану. Аствацатаряннул кIунттила уттинингу дурккун дур мура аралун хас дурсса монографияртту: «Ккавкказуллал ярагъуннил ва арцул давурттал тарих», «Ухссавнил Ккавкказуллал ва Заккавкказуллал ярагъуннил ва арцул давурттал усттартал» ва м.ц.
Цила луттираву авторнал биялсса кIантту хас бувну бур жула лакрал усттартуран, миннал буллай бивкIсса ярагъуннил ва арцу-мусил давурттал тарихран.
Бишлай буру му луттиравасса ХIХ ттуршукулул дайлитIулий ва ХХ ттуршукулул дайдихьулий Гъази-Гъумучиял округрайсса лакрал усттартурая ва хIалтIухъантурая, миннал цIанихсса ва магьирсса давурттая бусласисса бутIри.
ХIХ ттуршукулул 50-60-кусса шиннардий Гъази-Гъумучиял округрай хъинну гужлан хьуну бивкIун бур мах дуллалаврил пиша – ярагъуннил ва арцул даву, дувссилий сурат рищаву ва къалай дуккаву. Микку хьхьичIунмур кIанттугу бивкIун бур Гъумучияхь, хъиривра най диркIун дур цайми-цайми щархъивгу. Мукунсса давуртту дуллалаврил хъунмур мураднугу бивкIун бур, кьатIушав бувккун, ми дахху-ласулул хъун дуллансса, цуппа Дагъусттаннайгу, щала Ккавкказнавугу.
Цивппа яхъанахъисса кIанттурдайсса дугьай хъу-лухччинул чаншиву сававну, Гъази-Гъумучиял кIанттул халкь ччяния шинмайва аьдат хьуну бивкIун бур хIалтIилухун занай, хъунмур хIалтIигу бавхIусса бивкIун бур аьрщарацIун ва аьраяллил иширттацIун. Лакрал кьюкьри давлалий чIяруну ххяххайсса диркIун дур Гуржиянавун ва Ширваннайн, хъун бакъасса багьлух буххайсса бивкIун бур цумур духьурчагу дяъвилул кьюкьлувун. Яла махъ, Дагъусттан Аьрасатнавунгу бувххун, мукунсса аьраяллил давлардугу чан хьуну мукьах, ялу-ялун машгьургу хъанай, хъиннура цIакь хъанан диркIун дур хIалтIилухун заназаву ва пишакаршиву. Гьай-гьай, хьхьичIвагу лак мукунсса канил пишалул давурттаха (дувссилул т1ахIни-кIичIу, ярагъ ва заргалшиву) къазий къабивкIссар, амма кьатIушав лавгун ляхълахъисса хъинсса арцу гьарза хъанан диркIувкун, лап чIяву хьуну бур щархъаву му маэшатраха зузисса инсантал ва усттартал: 1886 шинал Гъази — Гъумучиял округрайсса 61 шяраву хIисав хъанай ивкIун ур 276 муххал усттар, 58 шяраву – 608 арцул усттар. Миннавату так ца Гъумук хIисав хъанай ивкIун ур 248 арцул усттар ва 63 муххал усттар, ГьунчIукьатIув – 53 арцул усттар, Ч1урттахь – 47, ЧIяв – 36, ШавкIрав – 26, ЧIарав – 17 муххал усттар ва м.ц.
1898 шиналсса Бакуйннал пробир идаралийн дуркIсса хIасиллай чивчуну бур: «Гъази-Гъумучиял, Аьшттиккуллал, ВицIхъиял ва Мукьархъиял найплугъирттайсса сайки циняв инсантал зий бур арцул ва мусил усттарнал сянатирттаха, зий бур, му даву дуллай, шаппагу, шяравугу. Ккавкказуллал билаятрал шагьрурдайгу, зий бур Аьрасатнал империялул кьиблалул губерниярдал шагьрурдай, цаппарассаннал миккува бур дуссукъатращалсса ттучаннугу. Махъунмай зана шай гъинтнил зурдардий (июнь, июль, август), чил кIанттайсса кIиришиву духIан захIматссагу дуну тIий, цала ичIаллил давурттугу дан багьлай буну тIий».
ХIХ ттуршукулул дайлитIулий ва ХХ ттуршукулул дайдихьулий гьарца шинах хIалтIилухун лагайсса ивкIун ур 600 усттар-заргал. Миннавату яла чIявумигу бивкIун бур Гъумучатусса. Хъирив лаян бювхъумунийн бувну, Гъумуксса 262 усттарнаяту кьатIув хIалтIилухун лагайсса ивкIун ур 237 инсан, так 25 личIайсса ивкIун ур кIиккува цала миналий.
Е. И. Козубовскийл бусласимунийн бувну, ми шиннардий муххал усттарнал давуртту хьхьичIунну диркIун дур Гъази-Гъумучиял округрал 14 шяраву; ярагъуннил пишалуха зузиминнуву мунал кIицI дурну дур кIира шяравалу: ЧIяйми ва Ккурккул – микку хIадур дайсса диркIун дур ххаржантру, турду, шушкарду («выделка»), Гъумук тIурча, щаллу дайсса диркIун дур миннуйхсса кьалан битаву, яни ярагъунний мусих ва арцух чичаву («отделка»).
В. К. Згленцкийл 1902 шинал тIимунийн бувну, ми давурттал дякюруну хIисав хъанай бур кIава Гъумучи: кIикку дуллай бур арцул чIюлушивуртту, ттупангирттай мусил ва арцул накьичру дишаву-цIавцIаву. Арцул давуртту дайсса гайми щархъаву тIурча (Гьухъалив, Ккулув, Хъусрахь, ЦIувкIрав, ЧIарав, КIундив, ГьунчIукьатIув, ЧIяв, Ккурклив), зий ур ивкIун так ца-ца усттар.
Лакрал усттартал зун бувкIсса Заккавкказуллал цалчинсса шагьруну хьуну бур Ттуплис. 1867 шинал Гъумукун увкIун ивкIсса Н. И. Воронов чичлай ур:
«Изделия кази-кумухцев проникает уже в Тифлис; между ними есть замечательные оружейные мастера и искусные резчики на металле и кости». РяхцIалулкусса шиннардийва Ттуплислив зий ивкIун ур бусурман цIарду дусса 11 арцул усттар, миннаясса кIиннал цIанил ялун ххи байсса бивкIун бур «Гъази-Гъумучиял» куну.
1868 ва 1878 шиннардил дянив ялун ххи хьуну ур Дагъусттаннаясса ялагу 10 усттар, 1878 шиная 1917 шинайн бияннин тIурча, миннал аьдад лархъун дур 100 инсаннайн.
Му чIумал Ттуплислив зузисса 122 дагъусттанлувная 103 ивкIун ур лаккучу, миннаяту 93 – Гъумучатусса, цайми щархъаясса – 1-нная 4-ннайн бияннинсса. Арцул усттартал бакъассагу, Ттуплислив зий ивкIун ур ялагу 10 турду ва ххаржантру дувугу, миннаяссагу 7 – Гъумучатусса. Ттуплислив бакъагу, лак зий бур бивкIун бур Гуржиял цайми-цайми шагьрурдайгу. Масала, Кутаислив ва Батумрай зий ивкIун ур Гъумучатусса 21 ва 18 инсан, гайми щархъаяту – кьуния рях-ряха инсан. Сухумрайгу зий ивкIун ур 10 инсан.
Мукунма къачансса лак лагайсса бивкIун бур хIалтIи бан Баргъбуккавал Заккавкказуллал шагьрурдайн ва шяраваллавунгу. 1877-1917 шиннардий Бакуйннал шагьрулий хIисав хъанай ивкIсса 370 усттарнаяту 50 ивкIун ур Дагъусттаннаясса, миннаву Гъази-Гъумучату – 13, ХьурукIрату – 12, яни 25 лаккучу. Шама ивкIун ур Оьргърал шяравату. Гайми 22 – Дагъусттаннал личIи-личIисса щархъаяту. Щалагу Бакуйннал округрай тIурча, 1898 шиналсса ккалдануву хIисав хъанай ивкIун ур 1036 арцул ва мусил усттар.
Бакуйннал пробирданий зий ивкIсса В. К. Згленскийл чивчуну бур укун: «Значительное число самых искусных – 131 человек – составляют жители Южного Дагестана, главным образом кази-кумухцы, которые почти исключительно занимаются производством разного рода туземного оружия и оправ из драгоценных металлов для шашек, кинжалов, пистолетов, оружий, а также выделкой разных фасонов поясов и высокопробного золота и серебра. Лезгинской выделки ружья и пистолеты весьма часто снабжены художественной отделкой, инкрустацией из золота и серебра. Изделия лезгин отличаются своей неподражаемой чернью и чистотой резьбы».
Бакуй бакъассагу, лак зий бивкIун бур ялагу Геокчайлив, Кюрдамирдай, Къубаннай, ЗакIатIаллал округрай. ЧIявуминнал ккал диркIун дур 1-нная 5-ннайн дияннинсса. Так ца Белоканнай ивкIун ур 11 лаккучу. Арманинавунгу лагайсса бивкIун бур, амма чан-чанну: Хъарслив, Ардаганнай ва Олтилий зий ивкIун ур кIи-кIия, мукь-мукьа гъумучиричу.
Лакрал хIалтIухъантурал ца цамургу мугьали ппив хьуну бивкIун бур Ухссавнил Ккавкказнавух. 1886-1915 шинал Владикъапкъазрай хIисав хъанай ивкIун ур 33 усттар-дагъусттанлув, минная 17 инсан ивкIун ур Гъумучатусса. Грозналлал шагьрулий зузисса 13 дагъусттанлувнавату 9 ур Гъумучатусса, Петровскалий зий ивкIун ур 7 гъумучиричу. Биялсса хIалтIухъантал зий бивкIун бур Адигайннал, Къабардиннал, Балкьарнал ва Къарачайнал шяраваллавугу.
ХIалтIухъантал, цивппа чунмай гьарчагу, чIун дургьуну гъинттул кIива-шанма зуруйсса зана шайсса бивкIссар махъунмай, хаснува цIу ппурттуй. Амма, чан-чанну тIий лаллай, кIанттул хъанай, миннавасса цаппарассаннал, миккува къатригу машан лавсун, цала кулпатругу тихунма буцлай бивкIун бур. Революция хьуну махъ тIурча, чIявуми зана хьуну бунуккар махъунмай.
Мукун, хIалтIилухун занай бушивруцIун бувну, хъинну бюхттулсса даражалийн гьаз хьуну диркIун дур лакрал усттартурал муххал даврицIун дархIусса пишакаршиву. Му феномен бачIингу бучIир шанма бутIуйх – цакуну му сянат сукку шаву, анаварну хьхьичIуннай дачаву – кIира никирал лахъишиврий, ва яла, чIара-чIара тIий, шамилчинмур никирайн дирувкун, лерщун лагаву. Шамилчинмур никирал лак, му буттахъал пишагу тинмай бувну, ласлан бивкIун бур кIулшивуртту ва цивппагу бувххун бур цамур социал аралувун – интеллигенциянавун.
Хъиривгу буссар
ХIадур бувссар
Р. Башаевлул
Лакрал усттартурал щаллу дуллалисса ассортиментравун духхайсса диркIун дур цуппа ярагъ баву ва бувну махъсса ганил чIюлу бавугу. ЧIиллу дувултрал («клиночниктурал») дайсса диркIун дур турдансса ва ххаржантрансса чIиллу (тиярду), арцул усттартурал тIурча, ххуй-ххаллил бувайсса бивкIун бур гайннул кьуртти ва къатри (хьуйрду).
Ттупанчартту ва пистолетру арцул усттартурал чIюлу байсса бивкIун бур мусих ва арцух чирчусса цIурцIу накьичирттайну. О. В. Марграфлул бусласимунийн бувну, оьргърал цала бувсса ттупанчартту бакьин ва бюхъан бан булайсса бивкIун бур Гъумучиял усттартурахьхьун. Лакрал усттартурал щаллу дайсса диркIун дур оьрус аьралуннал заказругу. 1869-1870 шиннардий Гъазигъумучиял округрайсса «тархъан усттартурахь» («вольные мастера») заказ дурну диркIун дур Кьубаннал къазахъ аьралуннансса 1000 тур. 1872 шинал ми турду, дугудурну, диян дурну дур Екатеринодардайн, тиччагу дарххуну дур къазахънан 3 къуруш ва 15 кIапIикIран ца хIисаврай.
Арцул усттартурал пишакаршивруву биялсса кIантту бугьайсса бивкIун бур арамтурал мухIултгу, чиллу, хъаннил мухIултту ва личIи-личIисса чIюлушивуртту даврилгу. Мира ми затру дайсса диркIун дур хIалтIухъантуралгу, так микку, цивппа зузисса кIанттайсса инсантурал тIалавшиндарах бурувгун, миннал даххана дайсса диркIун дур формагу, орнаментациягу. Масала, Ухссавнил Ккавкказнаву личIину къаххирасса бивкIун бур хъунисса ва кIусса ярагъ, мунияту лакрал усттартурал дайсса диркIун дур хъуни дакъасса исвагьисса ххаржантру. Заккавкказуллал хъаннилми мухIулттив лархьхьусса диркIун дакъар Дагъусттанналми хъаннил мухIулттаха, мунияту лакрал усттартуралгу мухIулттив дайсса диркIун дур, му кIантту хIисавравун лавсун, амма цирда чIюлушивурттурив тIурча дайсса диркIун дур, так цалвамур хат ва хасият ишла дурну.
ХIХ ттуршукулул кIилчинмур бутIуй Дагъусттаннайн, цияIав дайшушругу дакъа, дукIлан диркIссар металл, сайки 2 сантиметралийн дирсса утташивугу дусса. Усттартурал машан ласайсса диркIссар хIукуматрал чаннаннил тахтарду, кьукьайсса бивкIссар гайннуя цагнма аьркинссаксса лагрулул касакру. Бивхьуну касак цIараву, битайсса бивкIссар яргну ятIул лаганнин, ва яла батлай, кьутI буллай, лахъи букан байсса бивкIссар дан нанисса турданул ягу ххаржандалул дуциндарайн бияннин. Мукун дарттун мукьах чаннан дитайсса диркIссар дякъиннин, яла итадакьайсса диркIссар хъаласса хъицIив бусса хъинну кьянкьасса чарийх-диабазрайх.
Муния гихунмайгу, туну, байбишайсса бивкIссар тур-ххаржандалул тия аьркинсса кIанттайн биян буллалисса, цаннил хъирив ца саргъунну бартбигьин аьркинсса цимивагу процесс.
1.Тиялул цалчинсса бювчIан баву:
Лавсун мюршсса наждак, усттарнал хIала байсса бивкIссар га хьюмусса тIаннул синттаравух (клейравух), гайннуя дукьрасса масса хьунцIакул; яла гай дукьрашиву дугъайсса диркIссар цалуннасса тIаннул нигьирайх, дитайсса диркIссар къакьаннин ва кьянкьа хьуннин кIира-шанна ссятрай, яла, дуклай га нигьирайх, хъиннува бювчIан байсса бивкIссар тия, цIан-чани хIаласса пар личланнин. Яла, бувкIун га тиялул мицI ганиннинма хIадур бувну бивкIсса тIаннул кюрттаравунгу, цIакь бувну чIанкъатлуву ягу чIирттарай канил бугьаймур кIанттугу, усттарнал хьхьачин дайсса диркIссар тIаннул кюрттарайн цалла лякьа. Яла, ларсун хъинну сасан дурсса чаннанни кьукьу, цал куклкнк, яла ялу-ялун гуж бутлай, га ттигу кьянкьа къавхьусса тиялул лякьлуйх дичайсса диркIссар рахIру-лаяла кIирагу чулухух, мугу дайсса диркIссар хъинну усттарну, ваца чаннанния дакъача, тIаннуя цIалцIи дизан дуллалисса кунна. Яла марцI дайсса диркIссар гай рахIругу мунинна куса ххуххутIух.
2.Ранна дурккун, цIай-цIайтIи даву:
ЦIарай цIакьсса тIахIунттуву (тигель) кIири байсса бивкIун бур дувссилул купорос – щинащал архIал 1:2 пропорциялий: кIирину дунура ми хьюмушиву дугьайсса диркIун дур гьивхьхьул тIаннул дурсса нигьирал ккурккайх, гай гику кьянкьагу даргун, ххуйну цIакб хьувкун, гайннуйх суку байсса бивкIун бур турлил тия, дагьанттул цIай букканцIакул.
3.Мугьру бищаву:
Тия бишайсса бивкIун бур пурш-патанттул ламарай. Чансса ятIул лаганнингу бивтун, яла бивхьуну лурзимуххайгу, мунинма ляхъан бувсса штампрах бищайсса бивкIун бур мугьру – усттарнал цIа ягу Кьурандалул аят дусса. (Дагъусттан Аьрасатнавух хIала бухханнин чичрурду хъунмурчIин дайсса диркIун дур аьраб хатIлий. ХIала бувххун махъ тIурча, усттарнал цIа кувни чичайсса диркIун дур оьрусрайгу, масала «Сулайманъ», «Османъ»).
4.Накьич дишаву:
Накьич дишин цала язи бувгьусса кIанттул лагма усттарнал рутIайсса диркIун дур дарцIан дурсса цIукул май. Гай дяркъукун, тIаннул касакрал мицIлих га майлий дайсса диркIун дур накьич, ягу чичру:
5.Чаннамирай чичру-сурат дагьан даву:
Ларсун мяйра грамм муххал купоросрал, дассан дайсса диркIун дур дяркъусса щинаву (110 куб.см.) мукьра-ххюра минутIрайсса, яла тIаннул кIунулийх кай-кай бувну ччанаппи, дугьайсса диркIун дур гай хьумушиву цIукун майлий дирхьусса накьичравух, ягу чичрулувух, мукун кьаритайсса диркIун урчIра-ацIра ссятрайсса. Му чIумул мутталий гай руртIусса хьюмушивугу дюххайсса дур чаннаннивун 1-1,5 мм. КуртIшиврий, га накьичралгу (ягу чичрулул) шайсса дур лухIисса ранг. Яла, наждачкалух ссукугу дурну, дюрчIан дайсса диркIун дур цIуку-кьяцлул луттирал касакрах.
6.Чаннаннин щин дулаву:
Усттартурал чаннан сасан дайсса диркIун дур кIира кьяйдалий, амма миннал сайки гьарцаннал диркIун цанна-цанналусса кьяйдардугу, цайминнан кIул хьун къабацIайсса профессионалсса кьюлтIшивурттугу.
Ца яла машгьурмур кьяйдану хIисав диркIун дур сасан дуллалисса чаннан хьюмушиврувун щаву – навтливун, аммиакравун в м.ц. Амма щинавун къащайсса диркIун дур, цанбакъарча, ятIул ларгсса мах щинаву диширча, га ччяни гъагъан бюхъайссаннун ккалли дайсса диркIун дур. Ца цамур кьяйдагу диркIун дур укунсса: тиялул кIивагу чул бущайсса бивкIун бур атилгу дурсса хъахъисса синааьрщарай, яла ца 8-10 мм хIисаврай чIалачIи дайсса диркIун дур тиялул зумарду, дишайсса диркIун мукун пурш-патанттуву 10-20 минутIрайсса, аьрщи кьагу кьагу-кьаркьун, цийнура цурда кьатI хьунцIакул. Мукун дурсса чIумал, хъинну сасайссар тIар зумарду, дяни валу тIурча, аьркинссаксса кIукIлугу хьуну, лахIлахIи шайссар тIар ччимур чулийннай, гъагу-къагъагълай.
7.ЛухIисса цIай бучIан баву (воронение):
Гайра 8-10 мм хIисавну зумардугу марцIну диртун, дуккайсса диркIун дур кIийлла цIукул май, муния махъ тиялул дянивух тихагу, шихагу лачIун байсса бивкIун бур уссал купорос («сапожный купорос»), яла му бугьайсса бивкIун бур пуркIу тIисса навтлил чирахърал ялун. Мукун щалва купорос ччувччуну къуртал хьуну мукьах, тия марцI байсса бивкIун бур хъинну мюршсса (сайки ххитну чIалачIисса) къундалий, хъирив ялтту дуккайсса диркIун дур хьхьирилул тIаннул цIуцIалтту – цIай-цIайтIи баншиврул.
8.Кьуру баву ва кIюйлуцIун цIакь баву:
Тур-ххаржандалул кьуру байсса бивкIун бур бугълул хэъирттараяту, моржрал ххутIаяту ва пилданул ттурчIаяту (магьилияту). Хъи кьукьайсса бивкIун бур лисри-лисри дурну, яла, цаппара хIаллай щинавугу бивтун, тIайла бацIан баншиврул ца кьинисса бурмакъяцIувун бавкьунугу бивтун, бишайсса бивкIун бур хъуннасса кIушиврул лув. Муния махъ гай хъирттарал пластинкарду мунинна хасъсса чIиллух кIюйлул пурмалий кьугу- кьуркьуну, дуккайсса диркIун дур кIира ккутI, яла аьркинсса куццуй дюрчIангу дайсса диркIун дур. Лапва магьирсса усттартурал цала кьуртти кьукьайсса бивкIун бур пилданул ттурчIаяту (магьилияту) ягу моржрал ххутIаяту. Мусил инкрустациягу дурну, щаллу хьуну мукьах миннуяту шайсса бивкIун бур ялугьлай ябатIин къашайсса ххуйшиврул ва исвагьишиврул кьуртти.
9.Къатри (хьуйрду) баву:
Турдан, ххаржантран къатри баншиврул усттарнал ишла дайсса диркIун дур куклусса, къатру-къатру дусса тIама. Ларсун га тIаннул тур-ххаржандалул дуцингу, кьукьайсса бивкIун бур ххишалами кIанттурду. Яла цIувцIуну, марцI байсса бивкIун бур хьуйлул ялттуми чуллу наждакрах ва ххуххутIух. Виватуми чуллу тIурча, цIуцIайсса бивкIун бур мунинна куну дурсса инструментрах (хайбучу). Яла лавсун аьраян бувсса яттил Лу, бивхьуну чаннаннил матрицалийгу, баттайсса бивкIун тIаннул кьютIилттух. Бавттун махъ, кIункIу хьун бувну лагмава, бивщуну мярдугу, кьабитайсса бивкIун бур кьакьанцIа, кьавкьун мукьах ххартI дайсса диркIун дур бурчул вихсса къат (мездра) 1 мм дияннин. Яла кьукьайсса бивкIун бур гания хьуйлул куцру ва лачIунгу байсса бивкIун бур ялун синттарай. Муния махъ лаххайсса бивкIун бур инкрустациялулгу хьун бувсса муххал ккарк-ххаржан мухIулттуцIун цIакь лавансса бурхIлу (му цуппагу лаххайсса бивкIссар хьуйлул мицIлияту лавай). Хьуйлул ахир-зуманиврив тIурча, цIакь дайсса диркIссар муххал чIирисса ччикьа.
Хъиривгу буссар
Лакрал арцу-мусил усттартал, хIалтIилухун занай бивкIмигу, шиккува Дагъусттаннай зий бивкIмигу, 1889 шиная шинмай байбивхьуну, гьуртту шайсса бивкIун бур личIи-личIисса ккаккиярттай (выставкарттай). 1889 шинал Ттуплислив хьусса Ккавкказуллал шяраваллил хозяйствалул ва промышленностьрал ккаккиялий цала дурсса давуртту тамашалун дирхьуну бивкIун бур лакрал заргалтал: ХIусайн Мунчаев, Шахша ХIажи-угъли, Маммалай АхIмад-угъли, АьвдурахIман Шахша, Сулайман Давуд-угъли, Сяид Аьбдул-ХIамид-угъли ва ХIажи МахIаммадов. Мура ккаккиялий гьуртту хъанай бивкIун бур КIапIкIайсса (Владиккавкказраясса лакгу) Юсуп Тамаданов (луттирай фамилия чирчуну дур укун – Р. Б.), Исмяил Тамаданов, Тамадан Такмаданов ва Оьмар Буттаев. Миннал тамашалун дирхьуну диркIун дур мусих бивхьусса хатIлил ва моржрал ххутIал чIюлу дурсса шушкIарду (250 къурушрансса), ххаржантру (70-100 къуруш) чиллу (100 къуруш), мукунна лухIи накьич дирхьусса арцул мутталлагу (оправа) дусса ххаржантру (20-75 къуруш), чиллу (20-50 къуруш), Гуржиял ва Дагъусттаннал мухIулттив (35 къуруш), ва ахиргу, чаннаннийх мусил хатI бивхьусса ххаржантру (30-100 къуруш), мухIулттив (50-65 къуруш), къалиянну, аьсаврду ва мукунна цайми-цаймигу мюрш-кьюрш. Багърал лахъшивугу хъар хъанай бивкIссар ххирасса материалу ишла даврийн ва даврил магьиршиврийн.
Мура Ттуплисливсса ккаккиялий гьуртту хъанай ивкIун ур Гъази-Гъумучиял округраяту увкIсса ялагу шама заргал: МахIаммад ХIажи-угъли (Гъази-Гъумучи), мунал экспонатруну диркIун дур лухIи накьичгу дусса, мусил щингу дурксса муталлалущалсса ххаржан-заназисса бурхIлугу бусса (100 къурушрансса), мусил накьич дусса магьилул ттурчIая дурсса муталлалущалсса чиллу (16 чила 120 къурушрансса), мусил накьич дусса магьилул ттурчIая дурсса бляхардащалсса мухIулттив (100 къурушран), мусил накьич дусса магьилул ттурчIая дурсса къути (60 къурушран); Юнус Ибрагьим-угьли (ГьунчIукьатIи), мунал экспонатну диркIун дур лухIи накьич дусса арцул муталлалущалсса ххаржан (55 къурушрансса); Муртязали-угъли (КIувур), мунал ккаккиялун дирхьуну ивкIун ур, лухIи накьичгу дирхьуну, мусил щингу дурксса ва лях-лях мусил накьичрай чIюлу дурсса магьилул касакругу бивчусса муталлалущалсса ххаржан (80 къурушрансса). Ми шамунналагу та ккаккиялий ларсун дур чарвитул медаллу.
1900 шинал Парижлив хьусса дунияллул ккаккиялий Ттуплисуллал шагьрулул чулухату гьуртту хъанай ивкIун ур шама усттар-лаккучу: Шахша ХIажи-угъли (1889 шиналсса ккаккиялийгу гьуртту хьуну ивкIсса), Аьбдул-Рашид Аьбдул-угъли ва Жабраил Ибрагьим-угъли. Мура ккаккиялий Бакуйннал шагьрулул цIаниятугу гьуртту хъанай ивкIун ур лакраясса ххюя усттар: МахIаммад-Расул Мямма-угъли Жандаров (мунал экспонатруну диркIун дур аьсав ва мархь), Сайпулла Къаравали-угъли (чиллу), ХIусман Мусса-угъли Жандаров (ххют), Муса МахIаммад-угъли ва МахIаммад ХIажи-угъли (ванал ци экспонатру диркIссарив ккаккан бувну бакъар). Балахани тIисса шагьрулул чулухатугу ивкIун ур усттар Жабраил Мусттапа-угъли.
Муния махъгу личIи-личIисса кIанттурдай хьуну диркIсса хъуни-хъунисса ккаккиярттай, кIай жува ттинин кIицI бувсса усттартал бакъассагу, гьуртту хъанай бивкIун бур лакрая ялагу укунсса усттартал-заргалтал: Аьбдул Аьлиев, Аьвдул-Кьадир Тутунов, Шабан Аьлиев, Костин ЦIаххай-угъли Баратов, ХIусайн-Аьли Ахундов, Халил Ибрагьим Уна-угъли, Асадуллагь Ахундов. Утти тIурча миннал ккаккиялун дихьлахьисса затирттаву ярагънияр ялттусса диркIун дцаайми экспонатру – аьсаврду (тростьру), мархьру, качарбичулт, ххютансса кIюйртту, магьилул къутив, авурсса модельданий дурсса ккавкказ аьравалтту, гунгунтту, чаклин ишла дайсса затру ва чIюлушиннардан ишла дайсса личIи-личIисса ювелир затру.
Ми ккаккиярттай лакрал усттартурал ларсъсса цинярдагу наградарттал хъирив лаян жуща къабювхъунни. КIул бан хьунни так цаппарассаннуя. Бакуйннал шагьрулиясса заргал ХIусман Мусса-угъли Жандаровлул ларсун дур мадара медаллу: 1900 шинал Парижлив хьусса ккаккиялий мунал ларсун дур мусил медаль, 1901 шиналсса Ккавкказуллал ва 1902 шиналсса Петербургуллал ккаккиярттай ларсун дур кIира арцул медаль. 1903 шинал Петербургливсса ккаккиялий ларсун дур чарвитул медаль.
Гъумучатусса Оьмар ХIажи-угълил 1902 шинал Петербурглив хьусса ккаккиялий ларсун дур арцул медаль, кIиччавасса МахIаммад ХIусайн-угъли Къушиевлун буллуну бур мунал усттаршиврия цIа дуллалисса чагъар. 1903 шиналсса Петербургуллал ккаккиялий Дагъусттаннаясса ххюя усттарнан буллуну бур хIурматрал дипломру, миннавух бивкIун бур Аьбдул Аьлиев, Шабан Аьлиев, Аьвдул-Кьадир тутунов.
Лакрал хъинну чIявусса бивкIун бур заргалталну зисса усттартал, хаснува хIалтIилух шагьрурдай зузими. Му чIалай бур шагьрурдайсса пробир идарарттал дуллай бивкIсса ккал-сияхIрайн бувну. Амма дурсса затирай аьраб хатIлий чирчусса так цIанийну хъинну захIмат хъанай бур мяйжаннугусса залуннал цIа-бакI кIул дан. Нажагьлий бакIрайн багьлай бур цала усттарнал инициалу дусса мугъругу, муницIунна – пробир центрданул аьшгу. Кувни ми инициаллайн ва пробир центрданул аьщуйн бувну бюхълай бур кIул ан заллу.
Яларай жу ришлай буру лакрал орнаментика душиву исватну чIалачIисса ярагъуннийсса ва ювелир затирттайсса усттартурал цIардал графикалийнусса чIалачIингу, датардугу, миннул таржумагу, дурсса затирал цIагу (мунил цила номерданущал ва музейрал аьщущал).
1. «Дурссар Абакардул 1903». КуртIну кьалан бивтсса вал ухIи накьичгу дусса шушкIа, кIурадар орнамент (ГИМ 783).
2. «Дурссар Абакардул». КуртIну кьалан бивтсса вал ухIи накьичгу дусса ххаржан, мурхь орнамент (Телави. 4247).
3. «Дурссар Аьвдуллагьлул, Гъумучи». 1886-1889 шиннардийсса Ттуплисуллал ва АКС усттарнал мугъру. КуртIну кьалан бивтсса вал ухIи накьичгу дусса шушкIа, кIурадар орнамент (ДМИИ КП 7167).
4. «Дурссар Аьвдуллагьлул». Мугъру «04», Заккавкказуллал округ, 1908-1917 ш.ш. КуртIну кьалан бивтсса вал ухIи накьичгу дусса ххаржан, мурхь-орнамент (ГИМ 14041).
5. «Дурссар Абдрумлул». КуртIну кьалан бивтсса вал ухIи накьичгу дусса ххаржан, кIунтIарисса (дробный) орнамент (ГИМ 14039).
6. «Дурссар Аьзизлул 1306» (1888/89). КуртIну кьалан бивтсса вал ухIи накьичгу дусса ххаржан, кIунтIарисса орнамент (ГИИНВ 24164 КП).
7. «Дурссар Макал арснал Аьлил 1330» (1911/12). Гъази-Гъумучатусса усттар. КуртIну кьалан бивтсса вал ухIи накьичгу дусса ххаржан, кIурадар орнамент. Цува заллусса коллекция.
8. «Дурссар Аьлил 1337» (1918/19). КуртIну кьалан бивтсса ва лухIи накьичгу дусса ххаржан, мурхь-орнамент (ДМИИ КП 6219).
9. «Дурссар АхIмадлул 1319» (1901/02). КуртIну кьалан бивтсса ва лухIи накьичгу дусса ххаржан, кIурадар орнамент (ДМИИ б/н).
10. «Дурссар АхIмадлул». КуртIну кьалан бивтсса вал ухIи накьичгу дусса ххаржан, кIурадар орнамент (ДМИИ КП 6788).
11. «Дурссар АхIмадлул 1342 (1923/24). КуртIну кьалан бивтсса вал ухIи накьичгу дусса ххаржан, кIунтIарисса орнамент. Цува заллусса коллекция.
12. «Дурссар АхIмадлул 1924, 1342» (1923/24). КуртIну кьалан бивтсса ва лухIи накьичгу дусса ххаржан, кIунтIарисса орнамент (ГМИВН 3987 ш.)
13. «Дурссар Жалиллул». КуртIну кьалан бивтсса вал ухIи накьичгу дусса ххаржан, кIурадар орнамент (ГИМ 3558).
14. «Дурссар Жабраиллул». КуртIну кьалан бивтсса ва накьичгу дусса ххаржан, кIунтIарисса орнамент (ВИМАИВ и ВС 121/95).
15. «Дурссар Далухан-ХIажи Замриевлул (?)». КуртIну кьалан бивтсса вал ухIи накьичгу дусса ххаржан, кIунтIарисса орнамент.
16. «ХIамзат Кьаландар-угъли Асанов (?)». 1908-1917 шиннардийсса Владиккавкказрал ва ГК усттарнал мугъру. КуртIну кьалан бивтсса вал ухIи накьичгу дусса ххаржан. Мурхь орнамент (ГИМ 15578).
17. «Дурссар Исмяиллул». 1891 шиналсса Ттуплисуллал ва ИК усттарнал мугьру. (Мукунсса инициалу дусса усттар кIулну ур кIия: 1909-1914 шиннардий Сухумилий зий ивкIсса Исмяил Къапиев; 1886-1891 шиннардий Ахалцихилий зий ивкIсса Исмяил Кьадиев). КуртIну кьалан битсса вал ухIи накьичгу дусса ххаржан, кIурадар орнамент (ГМИНВ 5641/ш).
18. «Дурссар Исмяиллул». КуртIну кьалан бивтсса ва лухIи накьичгу дусса ххаржан (ГГМ 43-61/1, 49/67/1).
19. «Дурсса Исхаклул 1341» (1922/23). КуртIну кьалан бивтсса вал ухIи накьичгу дусса ххаржан, чаргас элементру дусса орнамент (ДМИИ 3299).
20. «Дурссар Кьасиннул» 1899-1908 шиннардийсса Заккавкказуллал округрал ва КБ усттарнал мугъру. КуртIну кьалан бивтсса ва лухIи накьичгу дусса ххаржан, кIурадар орнамент. Гъази-Гъумучатусса Кьасин ЦIаххай-угъли Баратов. Зий ивкIссар Бакуй, кIицI лавгун уссар 1899-1907 шиннардий. 1903 шиналсса ккаккиялул гьурттучи (ГИМ 13354).
21. «Дурссар Макал 1332» (1913/14). КуртIну кьалан бивтсса ва лухIи накьичгу, абия дирзсса филиграньгу дусса ххаржанну, арамтурал ва хъаннил мухIулттив, хъазамрайхдичулт. Цува заллусса хъус.
22. «Дурссар Маккал». КуртIну кьалан бивтсса ххаржан, мурхь-орнамент (ГИМ 15601).
23. «Дурссар Маккал». Кьалан бивтсса ва лухIи накьичгу дусса шушкIа, чаргас орнамент (Пятигорскаллал музей 4468). Гъази-Гъумучатусса Макка Маккаев (1864-1933) яхъанайгу, зийгу ивкIун ур Туапсинскаллал райондалийсса 1-мур Красноалександровка тIисса шяраву.
24. «Дурссар Мусалавл 1320» (1902/03). ЛухIи накьичращалсса ва абия дирзсса филиграньдалущалсса ххаржан (ДМИИ 1495).
25. «Дурссар Муслиннул 138 (1900/01). КуртIну кьалан бивтсса вал ухIи накьичгу дусса ххаржан, кIикъатсса орнамент (ДМИИ 7764).
26. «Дурссар Муслиннул». КуртIну кьалан бивтсса вал ухIи накьичгу дусса ххаржан, мурхь-орнамент (ДМИИ 7161).
27. «Дурссар МухIаммадлул 1294» (1877). Кьалан бивтсса ва лухIи накьичгу дусса тур, кIикъатсса орнамент (ГМИ-Ар4258).
28. «Дурссар Гъумучиял МухIаммадлул 1299» (188/82). КуртIну кьалан бивтсса ва лухIи накьичгу дусса тур, кIикъатсса орнамент (ГГМ 4813).
29. «Друссар МухIаммадлул». 1887-1894 шиннардийсса Ттуплисуллал мугъру. КуртIну кьалан бивтсса вал ухIи накьичгу дусса ххаржан (ГЭ 3378).
30. «Дурссар МухIаммадлул». 1891 шиналсса Ттуплисуллал ва ИК усттарнал мугъру. КуртIну кьалан бивтсса ва лухIи накьичгу дусса ххаржан, чаргас зумунусса орнамент (ГМИНВ 2608).
31. «Дурссар МухIаммадлул» 1895-1899 шиннардийсса Ттуплисуллал мугъру. КуртIну кьалан бивтсса ва лухIи накьичгу дусса пушкIа (ГМр 21-4012).
32. «Дуссар МухIаммадлул 1897 ш.» КуртIну кьалан бивтсса ва лухIи накьичгу дусса ххаржан, кIурадар орнамент (МИАз 3023).
33. «Дурссар МухIаммадул». 1899-1908 шиннардийсса, Заккавккауллал округрал ва МК усттарнал мугъру. Бюхъай ва МахIаммад Къажлаев икIан. КуртIну кьалан бивтсса вал ухIи накьичгу дусса шушкIа, кIурадар орнамент (ВИМАИВ и ВС 117/216).
34. «Дурссар МухIаммадлул 1319» (1901/02). КуртIну кьлан бивтсса вал ухIи накьичгу дусса шушкIа (ЦМВС 2551).
35. «МухIаммад Угъли Манаим 1324» (1906/07). КуртIну кьалан бивтсса лухIи накьичращалсса ххаржан, мурхь-орнамент (ГМИНВ 22706).
36. «Дурссар МухIаммадлул». КуртIну кьалан бивтсса вал ухIи накьичгу дусса шашкIа, мурхь орнамент, дяниву щавшсса щагу бусса (ВИМАИВ и ВС 117/214).
37. «Дуссар МухIаммадлул 1332 (1913/14). КуртIну кьалан бивтсса лухIи накьичгу дусса шушкIа, мурхь орнамент (ДМИИ КП 960).
38. «Дуссар Оьмар Кьадардул (Оьмар-Кьадир? – Р.Б.) 1284» (18-67/68). Кьалан бивтсса ва лухIи накьичгу дусса шушкIа, кIикъатсса орнамент (ГЭ 1980).
39. «Дурссар Оьмардул 1888». КуртIну кьалан бивтсса ва лухIи накьичгу дусса ххаржан, чаргас элементругу дусса кIурадар орнамент (ВИМАИВ и ВС, 121/790).
40. «Дурссар Оьмардул 1308» (1890/91). Кьалан бивтсса ва лухIи накьичгу дусса шушкIа, кIикъатсса орнамент (ДГОМ 15845).
41. «Дурссар ХIусманнул 1390/91). КуртIну кьалан бивтсса вал ухIи накьичгу дусса ххаржан, кIурадар орнамент. ХьурукIуллал шяраватусса усттар ХIусман Мусса-угъли Жандаров зий ивкIун ур Бакуй, кIицI лавгун уссар 1899-1911 шиннардий. Цимирагу ккаккиялул гьурттучи, Ларсъссар мусил, арцул ва чарвитул медаллу.
42. «Дурссар Охал (?)». 1886-1899 шиннардийсса Владиккавкказуллал ва ОА усттарнал мугъру. КуртIну кьалан бивтсса вал ухIи накьичгу дусса ххаржан, кIурадар орнамент (ВИМАИВ и ВС 121/78).
43. «Дурссар МухIаммадлул арснал Рабаданнул 1320 (1902/03). КуртIну кьалан бивтсса ва лухIи накьичгу дусса ххаржан, кIунтIарисса орнамент (ГИМ 13163).
44. «Дурссар Гъази-Гъумучиял Расуллул 1287». (1870/71) Кьалан бивтсса вал ухIи накьичгу дусса тур, Жура-журасса чIапIив ва къупру бусса орнамент (ГЭ 3805).
45. «Дурссар Гъази-Гъумучиял Рапсуллул 1297 (1879/80). КуртIну кьалан бивтсса вал ухIи накьичгу дусса тур, мурхь орнамент (ГМИАр 4243).
46. «Дурссар Расуллул Гъази-Гъумук». Кьалан бивтсса вал ухIи накьичгу дусса тур, Жура-журасса чIапIаяту, къупаяту, тIутIаяту дурсса орнамент (ГИМ 13454).
47. «Дурссар Буттал арс Сагурдул; Оьмар 1881». КуртIну кьалан бивтсса тур, кьукьарисса чIапIая дурсса орнамент (ГЭ 12778).
48. «дурссар Саэд МухIаммад Самахлул». 1886-1899 шиннардийсса Ттуплисуллал ва СА усттардул мугъру. КуртIну кьалан бивтсса ххаржан (ВИМАИВ ВС 121/156).
49. «Дурссар АН ХIажинал». КуртIну кьалан бивтсса ва лухIи накьичгу дусса ххаржан, мурхь-орнамент (ГИМ 15552).
50. «Дурссар ХIажи Маамлул 1323» (1905/06). КуртIну кьалан бивтсса ва лухIи накьичгу дусса ххаржан, мюршсса розеткардал орнамент (ГИМ 14374).
51. «Дурссар ХIажи Мусал 1297» (1879/80). Кьалан бивтсса вал ухIи накьичгу дусса шушкIа, кIикъатсса орнамент (ДГОМ 15871).
52. «Дурссар ХIасаннул 1318» (1900/01). 1899-1908 шиннардийсса Заккавкказуллал округрал ва СА усттарнал мугъру. КуртIну кьалан бивтсса ва лухIи накьичгу дусса ххаржан, кIурадар орнамент (МИАз 3053).
53. «Дурссар ХIусайннул». Кьалан бивтсса ва лухIи накьичгу дусса шушкIа, кIикъатсса орнамент (ГМИАр 4240).
54. «Дурссар Шабаннул». 1899-1908 шиннардийсса Заккавкказуллал округрал ва ША усттарнал мугъру. КуртIну кьалан бивтсса ва лухIи накьичгу дусса ххаржан, мурхь-орнамент. ХьурукIуллал шяраватусса усттар Шабан Аьлиев кIицI лавгун уссар 1887-1907 шиннардий (ШИМ 15548).
55. «Дурссар Гуцал арс Шагашбаглул (?) 1238». (1822/23). КуртIну кьалан бивтсса вап лухIи накьичгу дусса ххаржан, мурхь-орнамент (ВИМАИВ ВС 121/72).
56. 56. «Дурссар Шариплул». Гъази-Гъумучатусса усттар Шарип Куваев (Куяев? – Р.Б.) зугу-зий, ягу хъанай ивкIун ур Адигнаву Хакуринохабль тIисса шяраву ХIХ аьсрулул ахирданий – ХХ аьсрулул дайдихьулий. Хъаннил мухIлу. Цува заллусса коллекция.
57. «Дурссар Юнуслул 1877». Закавкказуллал зумуну дурсса лакку даврил дусса шушкIа (ДГОМ 15838).
58. «Дурссар Юсуплул». КуртIну кьалан бивтсса ва лухIи накьичгу дусса ххаржан, кIурадар орнамент (ДМИИ КП 8046).
Бивщун хIадур бувссар
Руслан Башаевлул
1
