Билаятрал ХIукуматрал хIукмулийн бувну, Аьрасатнал Минпромторграл Дагъусттаннан машан лавсун бур 42 куклу машина – УАЗ «Патриот».
Муния бувсунни ДР-лул ЦIуллу-сагъшиву дуруччаврил министерствалул пресс-службалий.
ЦIуллу-сагъшиву дуруччаврил министр Жамалуттин ХIажиибрагьимовлул бусласимунийн бувну, куклу машинартту занан тIий бур участковый хIакинтал къашайшалтрачIан шаппа-шаппай буцлай. Поликлиникарттай транспорт ххи даврийну бюхъан тIий бур агьалинал чулухасса оьвчавуртту ххишалану биттур дан ва хIакинтурал даву бигьа дан.
Ми машинартту занантIий бур амбулаториялул шартIирдай шаппа-шаппа хъин хъанахъисса коронавирусрал къашавайсса инсантуран даруртту ххилайгу.
Му бакъасса, республикалийн ттигу бувкIун бур кIанттая-кIанттайн занансса комплексру: цIусса нигьирттайсса ряхва цифровой флюорограф ва ца куклусса амбулатория.
Амбулатория буллуну бур Буйнакскаллал азарханалун, цифровой флюорографру Къизилюртуллал, МахIарамкантуллал, Табасараннал, Сулайман-Стальскаллал, Хасавюртуллал ва Нугъайнал районнал азарханардан.
Шиккува дакIнийн бутан, кIанттая-кIанттайн заназисса комплексру ДР-лул ЦIуллу-сагъшиву дуруччаврил министерствалул машан ласлай бусса бур «Здравоохранение» миллатрал проект щурущи баврил лагрулий.
