ХIурмат бусса дагъусттанлувтал!
Декабрьданул 3-нний щалла дунияллий кIицI дайссар Дунияллул халкьуннал дянивсса Инвалидтурал кьини. Мунил хъунмур мурад хъанахъиссар, жяматирттал гужру цачIун бувну, цIуллушиврул чулуха бюхъурду ссуссукьусса инсантуран цасса шартIру дузал даву.
Республикалий дузал буллай бур инвалидтуран къулайшинну дусса кIанттурду, социал объектру буллай бур миннан бигьашивуртту щаллу дурсса, ласлай бур инвалидтал занансса транспорт, миннан дуллай бур уква къатрал дузал бувансса субсидияртту.
Жулва аьмсса буржну хъанахъиссар ттинияр тихунмайгу инвалидтурацIун кабакьлакьаву, ми дуккин баву ва пишартту лахьхьин баву, спортравугу, творчествалувугу пагьмурду ялун личин буллан кумаг баву.
ЦIуллушиврул чулуха ссуссукьушивуртту думиннан ва миннацIун кабакьлакьиминнан чIа тIий ура цIакьсса цIуллушиву, талихI-тирхханну ва хъиншивуртту.
