Дагъусттаннал МВД-лул бусласимунийн бувну, 2020-ку шин дайдирхьуния шихуннай Дагъусттаннай 400-нния ливчусса ишру хьуну бур тIайладакъасса интернет-сайтру ишла дурну хIарамзадашивуртту ва хъямалашин дурсса. ЧIявучин хIарамзадатал укун зий бур. ОьвтIий бур инсантурачIан тIайла бакъасса « 900 » номердания – банкрал зузалара тIий. Буслай бур зул банкрал счетрая арцу дичин кьаст лархIуну дурча, счет лакьияра зула телефондалийн бувкIсса смс-кодрайхчIин тIий.

---

Ва кодрайхчIин тIурча, хIа­рамзадатураща бюхълахъи­ссар зул карталия арцу ликкан. Мяйжанмур къакIулсса инсантал, миннал тIутIимур бувну, къатIухьхьун бириллай бур.
Вай иширттал хIакъираву МВД-лул вакилнал цIухху-бусу бувсса Аьрасатнал банкрал зузалал бувсун бур цала мюхчаншиврул къуллугърал зузалтрал бурж бакъашиву клиентътурайн оьвтIун, миннал тачIав укунсса оьвчавуртту къадайшиву.

ТачIав мабусару кьюлтIну бикIан аьркинсса информация – смс-кодру, карточкалул номерду ва цаймигу затру телефондалувух. Дюъ дишара зула гъан-маччасса пенсионертурай ва бугьарасса инсантурайгу. ДакIний битияра, цавагу банкрал зузала, клиентначIан оьвтIий, кьюлтIсса информация кIул къабуллантIиссар.
Карталул счетгу, номергу, контрольный цифрардугу – банкрал кьюлтI буллалисса информацияр.

Агана зу ми затру аьч барча, зул счетрая арцу ликкантIиссар. Банкрал дюъ дишайссар клиентнай, «код цайминнахь мабусару» тIий.
Амма хIарамзадатал, му кIулну, зу анавар буккан буллай, ялун бигьлантIиссар. Агана зува, бакIрай къабавцIуну, мукунсса инсантурахь зула информация бувсхьурча, анаварну банкрайн оьвкуну, карта заблокировать дара, – тIий, бувчIин буллай ур Дагъусттаннал Виваллил иширттал министерствалул уголов розыскрал зузала, полициялул подполковник ОьмархIажи ЦIаххаев.
ХIарамзадатурал хъяврин буллай бур инсантал цамур куццуйгу.

Интернетравусса баян бавуртту, соцсетирдавусса личIи-личIисса затру дахлахисса сайтру ва страницарду ишла дурну. Инстаграмрай ци-дунугу заказ дурсса инсантуран кIулссар 90% даххултрал най буна дахлахимунихсса щала багьа тIалав байшиву. Амма му муштариначIан дияншиврул гарантия къадулайшиву.
ТIайлассар, ва ишираву ххуй­сса зат му бур, инсантура­ща цайминнайхчIин кIул бан бюхъ­лай бур ва ягу цама даххуйн вихшала дишин бучIиссарив ягу къабучIиссарив. Ци чулийгу, машгьурсса маркалул зат дахлахисса, вихшала дишин бучIину чIалачIисса даххултрал хъяврин бувсса кIанттурдугу хъанай бур.

Масала, нанисса шинал сентябрь зуруй Каспийскаллал виваллил иширттал отделданий къуртал дунни ца хIарамзаданал хIакъираву сукку дурну диркIсса уголов дело. Ва сантехника дахлахисса фирмалул сайтри тIисса сайт дурну, инсантал хъяврин буллай ивкIун ур. Силистталул ашкара бунни ванал хъяврин бувминнаву Дагъус­ттаннаясса бакъасса, Аьрасатнал цайми регионнаяссагу инсантал бивкIшиву. Ванал хIакъиравусса дело судрайн дуллуну дур.

Агьали бириллай бур цамур журалий бивзсса къатIухьхьунгу. Бур хIарамзадатал инсаннал акка­унт тIиртIуну, мунал цIания мунал сияхIрайсса гьалмахтурачIан вайксса-тайксса арцу буржирай дула тIий чичлачисса. Цаппара­ссаннал, щак-щук къачиншиврул, фотошоп дурну, бюхъайссар банкалул карталий вил дуснал цIа, фамилия чичингу. Вай ишир­ттайн вих хьуну, арцу дирчуссагу чан­сса бакъар.

ЛичIлулну бикIияра. ДакIний битияра, пикри бансса, бакIрай бацIансса мутта къабулуншиврул, миннал зу анавар буккан буллантIиссару: «мугьлат бакъа дичи», «банкомат ляхълай ба­къар», «на захIматсса иширахун агьну ура» тIий чичлай. Цаппара хIарамзадатурал щил-дунугу страницалийн бувххун, микку чичлай бур гъансса инсаннан кумаг аьркинну арцу датIлай бушиврия. Зура арцу дичиннин, кIул бувара му мяйжаннугу зула дус уссарив. Дагъус­ттаннал Виваллил ишир­ттал министерствалул пресс-служба буслай бур хIарамзадатурал агьали хъяврин буллалисса цIусса схемалиягу.

Инсаннал цала ци-дунугу дахлахисса баян баву рищайхту, хIарамзадатал оьвтIий бур мунал ккаккан бувсса номерданий. Ихтилат бувну, вихшала дишин увну, гьан дуллай бур даххучIан тIайладакъасса сайт, миккун цала цIа-фамилия ва банкрал карта гьан дува, дахлахимуних­сса арцу дичиншиврул тIий. Даххул ми кка­ккан дайхту, мунал счетрая ликлай дур арцу.
Полициялул зузалт маслихIат буллай бур онлайн журалий маша буллалисса чIумал личIлулну бикIияра тIий.

1. Щак багьан аьркинссар, агана муштари цIухху-бусу мессенджерданий буллай ухьурча. Цанчирча, дахху-ласу дуллалиминнал дуссар машлул хIакъираву цIухху-бусу байсса сайтру.
2. ХIарамзаданал ккаккан дурсса адрес дахлахиминнал официал сайтраха лархьхьусса дикIан бюхъайссар, амма мюрш бивкIун бургарча, дахханашиву хIисав хьунтIиссар (масала, ххишаласса хIарп, цифра ягу лишан).

3. Агана ина ккаккан бувсса кIанттурдай вила банкрал карталиймур аьч бувну, счетрая арцу ликкарча, хIарамзадатурал зухь учинтIиссар техникалул гъалатI хьуну бур, арцу занадикIантIиссар куну. ЦукунчIав вих машару ва кIилчингу карталиймур аьч мабару. Мугьлат бакъа полициялул отделданийн баян бара.
Дагъусттаннал Виваллил иширттал министерствалул пресс-служба.